Liyabashonela abagijimi abazimisele ngeComrades

UMsholozi uzohambela iJG Marathon ngeSonto eGreytown

LIYASHONA ilanga kubasubathi abangakayithumeli imininingwane edingekayo ukungenela iComrades Marathon ezokuba mhla zizine kuNhlangulana (June) isukela eThekwini isongwe eMgungundlovu.

Ukuthumela kuvalwa ngoLwesibili esiya kulona lomhla zimbili kuNhlaba (May). Kule mpelasonto mibili imijaho ezonika abasubathi ithuba lokugcina lokwenza izikhathi zokubamba iqhaza kulo mjaho webanga lika-90km ozokube ugubha iminyaka engama-92 wasungulwa.

Umjaho obhekwe ngabomvu yiJG Zuma Marathon ehambisana ne-21km no-10km ezokuba ngeSonto kusukwa eMpolweni kubhekwe eGreytown. Omunye umjaho yiHibiscus Coast Ultra Marathon (50km) ozokuba ngoMsombuluko ukwenza isikhathi sokubamba iqhaza kwiComrades. IHibiscus izosukela Ogwini Sports and Leisure kanti izokube ihambisana ne-25km ne-10km.

I-JG Zuma kulindeleke ukuba ihanjelwe nguMengameli wezwe, uJacob Zuma ezokwamukela izingqwele. Lo mjaho okuhloswe ukuhlonipha ngawo uMsholozi, uzokube ugubha unyaka wesithathu nonyaka. Kwaziswa abashayeli bezimoto ukuthi umgwaqo u-R33 ophakathi koMgungundlovu neGreytown uzokube uvaliwe ngosuku lwalo mjaho.

IMarathon izoqala ngo-6 ekuseni eMpolweni, i21km isukele emgwaqeni obheke eDalton ngo-6h30 bese i-10km iqala eMispa ngo-06h45.

UCeli Makhoba ongumdidiyeli walo mjaho, uthe izingqwele zizohlomula ngo-R50 000 kwehle njalo kuze kufike kwabe-10. Uthi imingenelo bazoyithatha ngoLwesihlanu eKings Park Athletics Stadium, baphinde bayamukele nangoMgqibelo eKing Edward Park, eGreytown.

UZo Zuma weJG Foundation, ukuqinisekisile ukuthi uMengameli uzokuba khona ehambisana noNdunankulu waKwaZulu-Natal, uWillies Mchunu, kanjalo nongqongqoshe abahlukene bakazwelonke nabesifundazwe kulo mjaho agcizelele ukuthi uzokube ukhonjiswa bukhoma kumabonakude.

Bayacelwa abasubathi ukuba bashiye izimoto zabo eGreytown, kuzokuba khona izimoto ezizobathatha zibayise lapho kuqala khona imijaho.

* Kwaziswa abasubathi besifundazwe ngokubhuntsha kweFields Hill Half Marathon ehambisana ne-10km ebizokuba ngeSonto eLahee Park, ePinetown.

* Kusenjalo, uFano “Manzini” Zungu wazisa abasubathi ngeLong Run yebanga lika-50km ezokuba ngoMgqibelo kusuka ngo-5 ekuseni eReunion. Lo mjaho uthi ngowokusiza abasubathi abazokube beyingxenye yeComrades Marathon. Uthi uzosukela eReunion ujike eMgababa uphelele khona eReunion.

Uthi ucela abasubathi ukuba baphathe u-R30 wokuthenga iziphuzo endleleni. Ngemuva komjaho bazocotshelelwa ngolwazi olunzulu ngezingqinamba zeComrades. Ngolwazi kungashayelwa uManzini kwethi: 083 342 2857.