I-ARROWS ISIKAZA UKUSHOVA IPIRATES KWAMASHU
ILAMONTVILLE Golden Arrows ihlela ukushova i-Orlando Pirates ePrincess Magogo Stadium, KwaMashu, kowe- semi final yeNedbank Cup.
La makilabhu aqhathwe ngoMsombuluko kusihlwa eGoli, kwathi i-Arrows yatonyulwa ukudlalela ekhaya. Le kilabhu yiyona enegunya lokuphakamisa kwiPremier Soccer League (PSL) ukuthi umdlalo wayo wasekhaya ifuna ukuwugijima kuyiphi inkundla.
Enye i- semi final izokuba phakathi kweChippa United neSuperSport United. IChippa yiyona etonyulwe ukudlalela ekhaya, kanti iSuperSport yiyona evikela le ndebe. Umthombo weLANGA okwi-Arrows uthe kungaba liphutha ukuthi lo mdlalo uyiswe eMoses Mabhida Stadium ngoba ijike ivune izihambi.
“Lo mdlalo sihlela ukuthi udlalelwe eMagogo ngoba yinkundla yethu yasekhaya. Umdlalo oba seMabhida uvuna noma ngubani. Izinto zivamise ukusiphika uma sidlalela imidlalo yasekhaya eMabhida. Nokho-ke sisabonisana, kodwa iMagogo yiyona engibona izosingatha lo mdlalo. I-PSL kayikwazi ukunqaba ngoba yona inegunya lokunquma ngomdlalo wamanqamu,” kusho umthombo.
UMato Madlala onguSihlalo we-Arrows ebuzwa ukuthi bazowugijima kuphi lo mdlalo, walile ukuphawula. Uzeseke ngokuthi usenqume ukungakhulumi ngezinto ezithinta i-Arrows njengoba eyibamba lesikhulu esiphezulu kwiPSL.
Unxuse leli phephandaba ukuthinta ngqo i-Arrows ukuthola ukuthi ihlela ukuwudlalela kuphi lo mdlalo. Uthe yena uzolinda izincwadi kuwona wonke amakilabhu atonyulwe ekhaya ukuphakamisa izinkundla azosingatha kuzona le midlalo yasekhaya.
UGordon Masondo oyisikhulu esiphezulu kwi-Arrows unqamukile ngesikhathi ethintwa, kanti emuva kwalokho ubengasatholakali ocingweni.
Umdlalo wamanqamu uzokuba mhla zingama-24 kuNhlangulana (June) eMoses Mabhida Stadium. IBucs izokhuza ibuya eThekwini kowokugcina we-Absa Premiership ezodudulana kuwona nayo i-Arrows eMabhida.
Lo mdlalo sihlela ukuba udlalelwe eMagogo ngoba yinkundla yethu...