KUZONANDISA UKHUZANI EMDLALWENI WE-KINGS NE-EAGLES
IREAL Kings United FC engomakoti kwiNational First Division (NFD) izobonga abalandeli bayo ngomculi kamasikandi othandwa ukufa kulezi zinsuku.
IKings izodudulana nomkhaya iRoyal Eagles koweNFD ngoMgqibelo ngo-15h00 eSugar Ray Xulu Stadium, eClermont.
Lo mdlalo uzokube ubhekwe ngabomvu ngabathandi bebhola kwazise la makilabhu asethubeni lokungena emidlalweni yokuhlungela ukunyukela kwi-Absa Premiership.
Nokho kulindeleke ukuthi inkundla ibe luhlaza cwe ngaba- landeli bakaKhuzani “Indlamlenze” Mpungose ongumculi kamasikandi oqashwe yiKings ukuzonandisa ngenhloso yokubonga nokujabulisa abalandeli bale kilabhu abebewa bevuka nayo kukuhle noma kunzima.
Lezi zindaba ziqinisekiswe nguPhilani Majola, ongumQondisijikelele weKings. “Umdlalo wethu uqondane kahle nempelasonto ende yingakho sinqume ukuba siqashe uKhuzani ukuzonandisa. Empeleni sihlose ukujabulisa abalandeli bethu nokubabonga ngokuseseka njengoba kuyisizini yethu yokuqala kulesi sigaba.
"UKhuzani uzobaculela ngaphambi kokuba kuqale umdlalo bese ecula nangesikhathi sekhefu. Amathikithi alo mdlalo azotholakala e- computicket, kanti abiza u-R30 bese kuthi awezicukuthwane abize u-R150.
"Cishe azoqala ukutholakala kusukela ngoLwesine. Izingane ezizofika zifake imifaniswano yesikole zizongena mahhala. Siyacela ukuba abantu bawaphuthume amathikithi basheshe bafike enkundleni ukugwema isiminyaminya. Ezokuphepha zizokuba seqophelweni eliphezulu abantu mabakhululeke beze bazo- jabulela umdlalo noKhuzani,” kusho uMajola.
UKhuzani ukuqinisekisile kuleli phephandaba ukuthi uzokube enandisa emdlalweni wala makilabhu womkhaya. “Amakilabhu asebonile ukuthi uma engiqasha inkundla ivele ibe luhlaza ngabalandeli bami. Ngiyathembisa ukuthi ngizoshaya into ecokeme ukujabulisa abalandeli ngamanoni ami akwi-CD entsha.
Abantu mabazobuka umdlalo nomculo engizobanika wona,” kusho uKhuzani osanda kuwola izindondo kumaNtshontsho waqokwa kwenye indondo kuwo.