IPirates ifaniswe nenja engenamazinyo
UThobejane akaboni simanga kumaBhakabhaka
I-ORLANDO Pirates ifaniswe nenja engenamazinyo ngaphambi komdlalo neBaroka FC kwi-Absa Premiership ozokuba namuhla ngoLwesithathu ngo-19h30 e-Orlando Stadium, eSoweto.
Lo mdlalo umqoka kula makilabhu njengoba esendaweni engeyinhle kwi- log. Asemngceleni wezembe okwenza kulindelwe umdlalo oseqophelweni eliphezulu.
UKgoloko Thobejane osethimbeni labalolongi beBaroka FC, uthi kayimethusi nakancane iPirates esiqala ukubuyelwa yisithunzi ngaphansi kukaKjell Jonevret waseSweden, ojoyine le kilabhu ngasekuqaleni komzuliswano wesibili.
“Siyibukile iPirates idlala neBloemfontein Celtic ngempelasonto, kangizange ngibone simanga. Ngizibonele inja nje engenawo amazinyo. Abafana bami kuzofanele bangakufaki emakhanda ukuthi badlala nekilabhu enkulu ngoba lokho kungasifaka enkingeni.
“Sizitshelile ukuthi sifuna ukunqoba imidlalo emithathu ilandelana kusukela kuwona lona wePirates. Uma senze kanjalo ngicabanga ukuthi sizokube sesilivikile izembe,” kusho uThobejane okuthe kuqala isizini wathi uzonqoba isicoco se-Absa Premiership emuva kokunyusela le kilabhu kulesi sigaba.
Nokho kakuhambanga ngokwamagama enkehli njengoba ibalwa navika izembe. Uke wagudluzwa esikhundleni sokuqeqesha kwaqashwa uJacob Sakala kodwa naye wabuye wadliwa yinkemba kule kilabhu.
U-Oupa “Ace” Manyisa onguka- puteni weBucs, uthi bazimisele ngokuqhubeka lapho begcine khona uma sebebhekene neBaroka.
“Lo mdlalo umqoka kithina ngendlela eyisimanga ngoba into esiyidingayo manje wukusonga isizini sikwi- top 8. Noma kanjani kufanele siwunqobe lo mdlalo futhi kangingabazi ukuthi sizowathola ephelele amaphuzu,” kusho uManyisa.