ABADLALI BAKWAZULU-NATAL BANUKELWA YIZEMBE KWELE-PSL
LILOLIWE izembe kuKhulekani “Chillies” Madondo ongumdlali waKwaZulu-Natal ogijima kwiPlatinum Stars ezogadulisana neFree State Stars kowe-Absa Premiership namuhla ngoLwesithathu ngo19h30 eMoruleng Stadium, eNorth West.
IPlatinum iya kulo mdlalo nje, isanda kuwashiswa ijezi yiLamontville Golden Arrows iyihlula ngo-1-0 koweNedbank Cup ngeledlule ePrincess Magogo Stadium, KwaMashu. Kulo mdlalo kubonakale uMadondo odlala esiswini kwiPlatinum, ozakhele udumo egijima kwiMaritzburg United nakumaZulu FC.
Lo mdlali uke wanyamalala ebholeni ngenxa yokulimala.
Nokho akawuqedanga lo mdlalo, ugijime isiwombe sokuqala kuphela wangabuya ngesesibili.
Leli phephandaba lihletshelwe ngumthombo walo ukuthi liloliwe izembe kulo mdlali odabuka eHowick, maphakathi nesifundazwe. Kuthiwa izikhulu zale kilabhu nethimba labaqeqeshi sebembekezelele kakhulu kodwa akakhiqizi msebenzi. .
Kuthiwa ngaphandle kwalokho, lo mdlali wafika enokulimala okunzima kule kilabhu wakufihla. Kuthiwa izikhulu zisanda kuthola ukuthi wafihla ukulimala.
ILANGA lishayela uCavin Johnson ongumqeqeshi wePlatinum ngalolu daba, uthe: “Okwamanje ngeke ngikwazi ukusho ukuthi sizodedela bani kumbe sizogcina bani. Konke lokho sizokubheka kahle uma isizini isiphelile. Kodwa ngeke ngikufihle ukuthi ngiphoxekile yindlela ayiyona manje uMadondo, akasesiyena lo mdlali ebengimazi.
“Bheka nje nasemdlalweni we-Arrows ngimukhiphe ngoba ubengenzi into ebengimutshele yona ubezenzela okwakhe wagcina ngokusidlisa, igoli esihlulwe ngalo lingene ngaye.
"Sesimubekezelele kakhulu engasenzeli lutho. Nokho kangisho ukuthi ngithini sizobona ngokuphela kwesizini.”
Omunye umdlali okuthiwa ingase ingavuselelwa inkontileka yakhe yile kilabhu nguSiboniso “Jomo” Gumede waseMpangeni osesizwa ngendaba isikimu kule kilabhu. Inkontileka yakhe nePlatinum iyaphela uma kusongwa isizini.
UJohnson ephawula ngomdlalo weFree State, uthe noma kanjani kufanele bawunqobe.
“Le nyanga kayisiphathanga kahle, sihlulwe emidlalweni obekufanele siyinqobe. Kodwa lo mdlalo weFree State noma kanjani kufanele siwunqobe akukho ukujikela emuva. Siyakuqonda ukuthi bavika izembe kodwa kasizukuba nalo uzwelo ngoba nathi sifuna i- top 8,” kusho uJohnson.