USEZAKHELE UGAZI KUBATHANDI BOZALO
USEPHENDUKE undabuzekwayo ezinkundleni zokuxhumana umlingisi wodumo womdlalo onguchungechunge kwiSABC 1 Uzalo.
UNtokozo Msibi odlala indawo ka-Amos Ma-Ada kulo mdlalo okhonjiswa phakathi nezinsuku, usezakhele ugazi kubabukeli balo mdlalo ngamagama awasebenzisayo ashiya abantu bechazekile.
UNtokozo, abaningi abaqale ukumbona kulo mkhakha edlala indawo kaChester kwiYizo Yizo yokuqala, usezakhele ugazi ngokusebenzisa amagama afana no”Butebhu” namanye.
Engxoxweni ekhethekile abenayo neLANGA LeTheku uthi uyayithokozela inhlokomo eqhamuka nendawo ayidlalayo kulo mdlalo.
“Indlela abantu abayithanda ngayo indawo engiyilingisayo iyangimangaza kanti ngihlale ngiqinisekisa ukuthi uma ngilingisa ngenza ababukeli bangangilibali,” kuchaza uNtokozo othi ubonga uT'zozo ngokungena kulo mdlalo.
Echaza ngokuthola le ndawo ayidlalayo uthi ubizwe nguT'zozo eseMpumalanga emtshela ukuthi kunenhlolokhono yabalingisi balo mdlalo.
“Ngingene ebhasini ngeza eThekwini. UT'zozo ungithathe wangiyisa emahhovisi alo mdlalo lapho sifike khona inhlolokhono isidlulile. Kunalokho bathathe uT'zozo bamenza umlingisi ngikhona bangishiya ngaphandle,” echaza.
Uthi ukhulumile nezikhulu zalo mdlalo, zamcela ukuba athumele i- profile yakhe zizomthinta, kunenye inhlolokhono.
“Nebala akuphelanga isikhathi esingakanani bangibiza bathi mangizokwenza inhlolokhono. Ngemuva kosuku ngenze inhlolokhono bangibiza bangitshela ukuthi sengiyitholile indawo kaAmos,” enaba. Uthi ngesikhathi engena kulo mdlalo ubezokwenza iziqephu eziyisikhombisa kodwa ngenxa yokuzimisela kwakhe lokhu kugcine kwanda.
“Ngikhuluma nje sebenginike inkontileka evulelekile yokuthi bangangibiza noma yinini uma bengidinga,” esho eqhuba ngokuthi uyazifela ngalo mdlalo nabantu asebenzisana nabo.