Kuncike kuwena ukuvikeleka kwesithunzi sophathina wakho
UMA abazali bethu besinika izibusiso baye bathi: “Ngifuna ukuthi noma ngihamba emhlabeni kodwa usunaye umuntu ozokugada”.
Lokhu basuke bengakusho ngoba nakhu usengozini okanye unezitha kodwa basuke besho ukuthi bafuna ukukushiya usunomakoti okanye usuganile.
Ukuba nomuntu okugadile-ke kusho ukuvikeleka. Ngakho-ke kungumsebenzi wakho ukuvikela isinqandamathe sakho kunoma ngabe yini embi noma engalungile engenzeka, engagcina idicilela phansi isithunzi sothando lwenu.
Ukuvikela isinqathandamathe sakho kusho ukuzivikela wena uqobo. Kumele sikuqonde ukuthi noma ngabe yini eyenzeka kubantu esibathandayo iyasithinta nathi ngandlela thile.
Bakhona-ke kodwa abantu abehlulekayo wukuvikela izithandwa zabo. Akufuneki ukuba uma uzwa abantu bekhuluma kabi noma behlekisa ngesithandwa sakho, nawe usizakale uhleke.
Uma ungumuntu owenza njalo kusho ukuthi usuke ungamthandi lowo muntu kodwa umkhohlisa, udlala ngaye.
Hlala njalo ukhumbula ukuthi kuwumsebenzi wakho ukuvikela isithandwa sakho.
Abanye abantu bayathanda ukuhleba, futhi indlela abathanda ngayo ukuhleba abenqeni nje ukuhleba othandiweyo wakho ngisho kuwena uqobo.
Kufanele wazi ukuthi lowo muntu okwazi ukuhleba isithandwa sakho kuwe kusho ukuthi kwawena akakuhloniphi.
Uma-ke wehluleka wukuvikela uthando lwakho nesinqandamathe sakho usuke uyihlaya nje kubantu. Uyilolu hlobo lomuntu okuthi uma kukhulunywa kuthiwe: “Akundoda yalutho”, noma “Akumfazi walutho”.
Kubalulekile futhi ukuba uqaphele ungavumeli izitha ukuba zingene othandweni lweni. Uthando yinto yabantu ababili - owesithathu akafuneki. Uma-ke nivumela abantu ukuba bangene phakathi kwenu, ningavikelani, kuyonakala.
Ngezinye izikhathi kuyenzeka abantu babone okuthile mhlawumbe okungekuhle okwenziwa yisithandwa sakho, bese begijima bezokutshela. Wena-ke musa ukusheshe uvuthe amalangabi, ngoba kungenzeka ukuba lowo okutshelayo yingoba edliwa wumona.
Kuhle nje ukuba uqaphele, ungalaleli zonke izinto ezishiwo ngabantu ngoba kungenzeka ezinye zazo zingabi yiqiniso.
Khumbula zikhathi zonke ukuthi abantu ngeke bakuthande bonke futhi ngeke bazijabulela izinto ezinhle onazo.
Angisho ukuthi thula uma umuntu wakho enza okubi. Kunezikhathi ezifanelekile zokukhuluma naye, umtshele izinto ongeneme ngazo. Futhi kuhle ukukhuluma ngezinto onesiqiniseko sazo, hhayi inzwabethi.
Ukuvikela umuntu akusikhona nje kuphela ukuqapha izitha kodwa wukuvikela ngisho imizwa yakhe.
Uma umuntu wakho umazi ukuthi unesikhwele, kumele ukuqinisekise ukuthi awuyenzi into ezomenza avukwe yisikhwele.
Mvikele futhi umuntu wakho nasebanganini bakhe ababi. Uma ubona ukuthi kunabangani bakhe abangalungile, hlala naye phansi, umbonise kahle, ungamlwisi ngoba lokho kungamenza angakuzwa nhlobo.
Mvikele futhi othandiweyo wakho nasezilingweni. Ngesinye isikhathi siye sifakane ezilingweni isidingo singekho. Iqiniso wukuthi singabantu emhlabeni sibuthaka.
Ukuzwe ngesinye isikhathi kuthiwe abangani badlene izithende, bathathelana abantu. Indaba ngesinye isikhathi isuke idalwe yikho ukuthi kukhona ohluleke wukuvikela omunye ezilingweni.
Uthole ukuthi umuntu wesilisa ukhululeke kakhulu, udedela abangani bakhe ukuba bajwayelane nesinqandamathe sakhe kuze kweqe. Usuke esekhohlwe wukuthi njengoba nabo bengabantu, bazokubona lokhu naye abekubone esithandweni sakhe, bese bekufisa.
Ukungavumeli isithandwa sakho sijwayelane kakhulu nabangani bakho akusikhona ukungasethembi kodwa kuwukusivikela ezilingweni.
Kuyafana nje nokuthuma abangani bakho endlini yakho uma ungekho - leyo nto iyingozi enkulu kabi ngoba umngani wakho uyakwazi ubuthaka bakho, angavele angene ngalelo nxeba.
Ngithi-ke qikelela ukuthi umuntu wakho uyavikeleka ezintweni eziningi. Isithunzi somuntu wakho sisho isithunzi sothando lwenu.