KWEHLUKA IMIBONO NGOKWENZEKA KWEZOKUSAKAZA
KUYATHOKOZISA ukuthola imibono yabalandeli bemisakazo ngezihloko ezahlukene ikakhulukazi lezi esisuke sibhale ngazo kule ngosi.
Lokho kwenza sigqugquzeleke thina esingababhali ngoba kusuke kuyinkomba yokuthi esikwenzayo kuyalandeleka.
Nakuba sinazo izingosi zezincwadi ezivela kubafundi kodwa le ngosi iseduze kwenhliziyo yami.
Sibone kungcono ukuba namuhla sishicilele lapha le mibono esiyithunyelelwe ngabanothando lwezemisakazo. Holla Zowakha!
MANGISHO nje ukuthi ngiyithanda kakhulu ingosi yakho yezemisakazo kanti futhi nami ngike ngathi ukubamba kancane kwiZwi LomZansi ngaphambi kokuba ngizosebenzela ngapha eNewcastle.
Angisho nje ukuthi ingiphula umoya indaba yomsakazo wangakakithi iRadio Sunny South 97.0 FM owakhele uMasipala uGu. Lo msakazo uyawa bhu kunokuba ukhule, uzokubona lokho uma ubheka izibalo zakamuva zabalaleli zakwaSAARF.
Lesi siteshi silokhu sishone phansi njalo kunokuba sikhule njengeminye imisakazo eyakhele amakhaya.
Isixazululo sale ndaba silula: Mabayeke izinhlelo ezithatha amahora amane, yisidala leso bese, beqasha abasakazi abazoheha abalaleli abakhele le ndawo. Mhlengi Mzelemu, EMTHWALUME Hheshe! INGOSI yakho ingenye yezingenza ngiqhubeke ngithenge ILANGA ngoba isikhathi esiningi kusuke sekuyizinto esezidingidwe, zahlaziywa zashiywa sezimathambomhlophe.
Uma ngingenzi iphutha bekukuyo le ngosi lapho ubalule khona ukuthi abalaleli bane-choice, ngakho kakumele uze ukhihle esikaNandi ngoba ulalele umsakazo owodwa ekubeni ungagculisekile.
Usuke ungabanjiwe ngenkani ukuze ulalele. Usuku lwami nje luqala ngokuhambisa izingane esikoleni.
Ngake ngaba ngumlandeli wokuqina kaGlen Lewis kodwa ngabuye ngashintshela kwiSAFM neRadio 2000, ngibuye ngiye kuLinda Sibiya oKhozini FM ngoba ngangimiwa emphinjeni ngu-Unathi Msengana.
Ngapha kuLinda ngangicikwa nguZama Ngcobo. Ngigcine sengizithanda lezi ziteshi ezimbili ngenxa kaJustice nethimba lakhe kwiRadio 2000 noSakina Kamwendo kwiSAFM.
Ntambama bengike ngivakashele i-East Coast Radio uma sengiphindela ekhaya, ngiye oKhozini FM bese ngiphelela kuMarawa kwi083 Sport with Marawa kwiMetro FM. Ngempela kukhetha ukhethi, ngakho-ke ubungeke ungizwe ngikhalaza.
OFresh, Khabzela, DJ Sbu babeyibambe kahle eYFM, ngibona sengathi sengizolingeka ngimlalele njengoba eseseMetro FM uFresh. Inkinga sekungaba yikho nje ukuthi imakethe yase5FM asesuka kuyo kayifani neyeMetro FM.
USomizi ulungele iTV, kuphela lapho futhi kungcono nje ukungasho lutho ngaye. Iqiniso wukuthi kuseyithuba lakhe lokudla njengamanje kodwa udumo lwakhe kwiTV kalumenzi ungqo womsakazi. Ukuthi umuntu uphelela kanjani emsebenzini othize kuyohlala kuyinzukazikeyi. USbu Buthelezi sengike ngambona ephethe uhlelo emicimbini embalwa engiyihambelile.
Namanje ngisazibuza ukuthi unomuthi yini ngoba akukho lutho olutheni alushoyo kodwake vele abantu kabayi nganxanye bengemanzi.
Imisakazo yomphakathi yona kakumele ibukeke njengabondli beziteshi ezinkulu kodwa iyabonakala inqubekela phambili yayo, inkinga wukuthi nje iningi layo lishoda ngesibunge soTbo Touch, Robert Marawa, DJ Fresh bese begcina sebenza izinhlelo ezingabalulekile kule misakazo. Ngiyema lapho. Thulani Gwala