Kuphume isidumbu kuxabana izelamani
Bezibanga intambo kagesi
IKHIPHE isidumbu ingxabano esuswe yintambo kagesi phakathi kwezelamani zaseKing Dinizulu, eShowe, enyakatho yeKwaZulu-Natal, ngoMgqibelo ebusuku.
Namanje umphakathi nomndeni wakwaNdlovu usashaqekile emuva kokuba uMnu Siyabonga “Sgujana” Mathaba (32) egwaze wabulala udadewabo omdala, uNkz Lindiwe Nini Khanyile (43), kubangwa intambo kagesi.
Kuthiwa lesi sigameko senzeke ebusuku ngoMgqibelo kade kunomcimbi wengane encane yakulo muzi.
Ngokuthola kweLANGA, kuthiwa umufi ujikijele ngebhodlela umsolwa ovele wacasuka maqede wadonsa ummese wamgwaza inxeba elilodwa entanyeni washonela khona lapho kubuka izingane zakhe, eneminyaka engama-22 nenemibili.
Umndeni uthi awuboni ukuthi usazokwazi ukwamukela uMnu Mathaba emuva kokwenza lokhu.
UNkz Hlengiwe Ndlovu, ongudadewabo kamufi, uthi ngaphambi kokuba kwenzeke lesi sigameko, bebejabule njengoba kade kunomcimbi wenye yezingane zikadadewabo.
“Ngesikhathi kunomcimbi emini, siboleke i- radio kaSiyabonga ngoba besingayifuni ezoba nomsindo omkhulu. Kuthe sekuntambama uSiyabonga waxhuma i- fridge ebelingenalutho phakathi entanjeni kagesi.
“Ngimbuze ukuthi ukwenzelani lokhu waphika ukuthi nguyena olibasile i- fridge. Umufi ube eseyathetha naye ebuza ukuthi ukwenzelani lokhu ngoba ikhadi likagesi lincane njengoba yena ebasa i- fridge elingenalutho.
“Baqhubekile nokuqophisana ngamazwi wabe esekhipha intambo kagesi obekuxhunywe kuyona wayibeka. Ube eseyahamba waze wabuya ebusuku. Ubuye esenolaka ebuza intambo yakhe kagesi. Ngaleso sikhathi mina bengikwelinye igumbi kodwa ngibezwile besaqhubeka nokuqophisana ngamazwi, bexabana.
“Umufi usuke lapho wacosha ibhodlela emnyango wajikijela uSiyabonga. Elokuqala ulivikile wabe esethatha elesibili lamshaya ebusweni.
“Usuke lapho wadonsa ummese wamgwaza kanye entanyeni wawa phansi kwaba wukushona kwakhe uLindiwe. Ngiphumile ngiyobheka ukuthi ulimele kangakanani uSiyabonga ngoba bengingakaboni ukuthi usegwaze udadewethu.
“Ubenegazi ebusweni nokuthe uma ngiya ngaphandle, ngafica umufi elele phansi ekhala ngoSiyabonga kugobhoza igazi entanyeni. Kungaleso sikhathi sibone khona ukuthi usemgwazile,” kusho uNkz Ndlovu.
Uthi bazamile ukuvala inxeba ukuba angophi kakhulu kodwa waphelela ezandleni zabo.
Uqhuba uthi okubuhlungu kakhulu ukuthi le nto yenzeke zikhona zombili izingane zikadadewabo zambona unina ephuma umphefu- mulo ebulawa nguninalume. UNkz Ndlovu uthi ingane kamu- fi encane njalo ekuseni iyavuka ibuze unina ukuthi ukuphi bayikhohlise ngokuthi usemsebenzini.
“Namanje singumndeni sisethukile futhi angiboni ukuthi sisazokwazi ukuhlala noSiyabonga emuva kwale nto ayenzile. Nathi sesiyamesaba uma ekwazi ukugwaza igazi lakhe alibulale ngesihluku esingaka.
“Ingane kadadewethu encane imbonile unina elele phansi egobhoza igazi. Uma siyikhohlisa ngokuthi usemsebenzini, iyasho ukuthi siyaphosisa unina usesibhedlela ulinyazwe nguninalume.
“Lokhu kukodwa kuvele kusilethele usizi ngoba asazi sizokwenzenjani. Udadewethu ubewusizo olukhulu lapha ekhaya, asazi njengoba engasekho ukuthi sizokwenzenjani,” kusho yena.
Ilunga lomphakathi, elingathandanga ukudalulwa, lithe umsolwa vele ungumuntu owuhlupho emphakathini njengoba uke waboshwa phambilini ngakho ukuhlupha kwakhe.
Uthi into ayenzile iwuthukuthelisile umphakathi.
Okhulumela amaphoyisa KwaZulu-Natal, uCapt Nqobile Gwala, usiqinisekisile lesi sigameko wathi umsolwa uboshiwe ngecala lokubulala.
Umsolwa uvelile eNkantolo yeMantshi eShowe icala lakhe lahlehla, kulindeleke ukuba aphinde avele khona mhla zimbili kuNhlaba (May) ukuzofaka isicelo sebheyili