ZIBANGWA NEZIBI IZELAMANI EZISINDE UNINA "EZIBULALA"
ZISINDE ngedlozi izelamani eziyisi-6 zakwaNdwandwe eSdinsi KwaNongoma, enyakatho yeKwaZulu-Natal, ezivuke sekuvimbanise intuthu kusha endlini ebezilele kuyona ngoLwesihlanu.
Kusolwa ukuthi uNkz Hlengiwe Mtshali (32) ongunina walezi zelamani nguyena odale konke lokhu ngokumbumbuzela uphalafini endlini maqede wazilengisa.
Kuthiwa emuva kokumbumbuzela uphalafini, ulayithe ikhandlela walibeka phansi, okugcine ngokuthi lishe lize liphele, okuyilapho umlilo utholane nophalafini kwasuka ilangabi elikhulu.
Kubikwa ukuthi uNkz Mtshali ubhale incwadi ngaphambi kokuba azikhunge.
UMnu Mandla Ndwandwe, ongumyeni wakhe - ozinze eGoli ngokomsebenzi - utshele ILANGA ukuthi ubuhlungu ngokwenzekile.
“Ngiphithene ikhanda, kangazi nokuthi ngenzenjani njengoba isimo sinje. Izingane zami zisesibhedlela ngenxa yomlilo oqalwe nguHlengiwe. Kunzima nakimi njengoba isimo sinje kangazi ukuthi ngicabangeni, ikhanda liyaduma.
“Ngikhuluma nje, ngilahlekelwe kakhulu ngoba uHlengiwe ubeyingoduso yami. Ngibonga uNkulunkulu ngokusindisa izingane zami. Ngicabanga ukuthi ukungabuyi kwami ekhaya ngamaholidi ePhasika yikhona okwenze wonke lo monakalo.
“Ngiyacabanga ukuthi akwehlanga kahle kuyena (uNkz Mtshali) uma ngimtshela ukuthi ngeke ngibuye ekhaya ngenxa yokuthi umsebenzi mningi kakhulu emsebenzini. Ngiyasola ukuthi uHlengiwe ushaywe ngezilwane, kunomuthi okuthiwa umazikhunge ngapha endaweni yakithi.
“Ngikhuluma nje kunabantu ababili abebefihlwa kule mpelasonto esiphuma kuyona nabo bazikhungile,” kusho uMnu Ndwandwe.
Ikhansela lendawo, uMnu Mbuso Hadebe, lithe liyalwazi udaba.
“Kusize ukuthi omunye wabantwana ubengakazumeki ngesikhathi kuqala umlilo. Omunye walaba bantwana udluliselwe esibhedlela iNgwelezane (eMpangeni, enyakatho-mpumalanga yeKwaZulu-Natal) ngenxa yokusha kakhulu,” kusho uMnu Hadebe.
Okhulumela amaphoyisa KwaZulu-Natal, uLt Colonel Thulani Zwane, uthe likhona idokodo elivuliwe esiteshini samaphoyisa KwaNongoma mayelana nomuntu ozilengisile.
Uthe uNkz Mtshali utholwe ezilengise endlini mhla zingama-28 kuMbasa (April).