Bahlaba udungunyane
Okudlule kulo abakamasikandi
SIGXEKWE nhlangothi zonke isenzo sokudubulana kwabantu ngempelasonto ezinkundleni zemidlalo eCurries Fountatin, eThekwini ngoMgqibelo ngenxa yempi yabaculi bakamasikandi. Kushone ababili kwalimala abathathu kulesi gameko.
Ingqalabutho kwezokusakaza umculo wesintu, uMnu Welcome “Bhodloza” Nzimande, ithi kuyihlazo ukuthi kusekhona abalandeli abehlisa isithunzi salo mculo. Uthi kubalulekile ukuba abahleli bemicimbi banikezwe ithuba lokukhuluma ngezokuphepha emisakazweni uma bezohlela umcimbi.
“Amaciko kumele ahloniphe umsebenzi wawo kanti nazo izinduna zabalandeli mazihole abantu ngeqiniso. Kuyihlazo ukuthi umasikandi usazoduma ngezimpi emuva kwemizamo eminingi yokubuyisa isithunzi sawo,” kusho uMnu Nzimande.
Kuzokhumbuleka ukuthi kwenzekile ukuhlaselana kwabalandeli ngesikhathi somubango wezinsizwa ezingasekho emhlabeni uKwakhe “Mgqumeni” Khumalo noMtshengiseni “iNdidane” Gcwensa. UMnu Shobeni Khuzwayo owayephethe uMgqumeni ngaphansi kwenkampani yeZingane Zoma Music Production, uthi le nto isiyaphuma esandleni futhi kuyaqala ngqa ukudutshulwa kwabantu emcimbini.
“Abaculi kumele bakuqonde ukuthi umculo uyibhizinisi kubona. Uma kuzokwenzeka kanjena bazozibeka egcupheni yokungaqasheki emicimbini. Lokhu kushiya imibuzo yokuthi bazokhuzwa ngubani ngoba bahlule amakhosi abo, okuyinto esingakaze thina siyizwe yokuthi umuntu engaphambana nomyalelo wenkosi,” kusho uMnu Khuzwayo.
Ngakolunye uhlangothi uMnu Sxhobo Mpungose we-Amon Music Production obephethe iNdidane, uthi uyakugxeka kakhulu ukudlula kwemiphefumulo yabantu ngenxa yalo mculo. Uveze nokuthi kumele kutholakale isixazululo kanjalo nomsuka wengxabano. UKhuzani uthe uyazwelana nemindeni ela- hlekelwe ngamalunga ayo wanxusa abaculi ukuba babumbane babe yinto eyodwa ngoba lokho kuzokwenza nabalandeli babumbane. Mayelana nesigameko, uthe:
“Imbangela yokudungeka komci- mbi mayibuzwe kumhleli wawo ehlangene noMjikijelwa ngoba bebehlelile ukuthi kuzobulawa igama lami kwazise baqhamuka ngandawonye KwaMaphumulo.
“Ukubona kwabo ukuthi ngisematheni kulezi zinsuku ngisanda kuthola nezindondo, basebenzise umcimbi wabo ukudicilela phansi igama lami. Vele ngicelile ukucula ngalesi sikhathi sehora lesi-7 ngoba bese ngazi izinhloso zabo.
“UMjikijelwa ukhulume nomhleli womcimbi wathi mina mangibhulele bona amazolo bengoNdabuzekwayo bavale nomcimbi uma sebeculile ngabodwana. Lokho kubonakale ngokuthi bona bebezocula bukhoma mina kwathiwa mangilingise i-CD.
“Lokho bekuhloswe ngakho ukungicindezela ekubeni izwe lazi kahle ukuthi ngubani uKhuzani futhi kunabaculi abebefonelwa nguyena uMjikijelwa ngezingxoxo zenkokhelo, okuyizinkomba zamandla akhe kulo mcimbi.
“Kwakhona ukuphazanyiswa kwami bekuhleliwe njengoba bekuqala ngqa emcimbini ukuthi abalandeli beGcokama nabakaMjikijelwa bafike bewumshungu. Izibhamu ziqhunyiswe ngicula, akekho okhuzile. Ngize ngaphuma ngibona ngingaphephile,” kusho uKhuzani.
Uyakuvuma ukuthi uhlanganile nabalanadeli bakhe isinguyazane kodwa wabakhuza ekutheni bangaphazamisi nakuba yena kade esephazanyisiwe wuhlangothi lwase- East.
UNgqongqoshe wezo-buCiko namaSiko KwaZulu-Natal, uNkk Bongi Sithole-Moloi, usezwa-kalise okukhulu ukushaqeka nga-lesi sigameko. Uthi lesi sihlava se-sifuna ukuba yinsakavukela kulolu hlobo lomculo.
UMthandeni ufoneliwe ukuze aphuwule ngalokhu kodwa akalubambanga ucingo kwaze kwashaya isikhathi sokuloba kanti UMjikijelwa uthi yena akahlangene nokuhlelwa kwalo mcimbi nokuthi abaculi balandelana kanjani ukungena esiteji.
“Okusho ukuthi iphutha lami kube wukubuza uKhuzani ukuthi akalamuli ngani abantu bakhe kwazise isigemegeme sokuqala okuthiwa sithinta abeGcokama senzeke ngingakafiki emcimbini kanti abalandeli bakhe ngibabonile behlupha.
“Nami ngidumele uma ngibona uKhuzani esecula ngezikhathi zakusihlwa kwazise sivamise ukudlala naye ebusuku kakhulu,” kusho uMjikijelwa.