Kusezandleni zezisebenzi ukukhomba indlela
ISENZO seCongress of South African Trade Unions (Cosatu) sokumema uMengameli Jacob Zuma emgubhweni wayo wosuku lwezisebenzi izolo eBloemfontein, senza sibone sengathi iyishaya emuva iyishaye phambili njengoba ingenye yezinhlangano ezithi makehle esikhundleni ngenxa yezinqumo nezenzo zakhe. Olunye ungabazane ludalwa yinkulumo kaMnu Amos Monyela walo mfelandawo wezinyunyana eGauteng, ayethule ngesikhathi iSouth African Communist Party (SACP) yakulesiya sifundazwe ikhumbula uMnu Chris Thembekile Hani ngempelasonto. UMnu Monyela uthe kabasho ukuthi uMengameli we-African National Congress (ANC) makasuke esikhundleni kodwa ngumengameli wezwe okumele ehle. Le nkulumo nezinye izenzo zeCosatu, kwenza sibone sengathi ididekile. Sikholwa wukuthi lo mfelandawonye wazi kahle kamhlophe ukuthi indlela izinto ezenzeka ngayo, sekufana nesiko ukuthi umengameli we-ANC kuba ngumengameli wezwe.
Sibona ukuthi uma kungagcina kukhona umengameli wezwe noweqembu elibusayo, ngokwehlukana, zinganda kakhulu izinkinga. Kuyiqiniso elaziwayo ukuthi izimeya ezihola omasipala zingebona ozihlalo bamaqembu azo, zithwala kanzima ngenxa yozihlalo abasuke befuna ukulawula umasipala ngesiqhebezabuqama. Ukuphumputha kweCosatu sibona kungayenza ilahlekelwe kakhulu kunakuqala njengoba vele kukhona izinyunyana ezingamankonyane ayo ebezingayizwa eyokumenywa kukaMengameli Zuma izolo. Lokhu kungenza ukuthi ihlomule iSouth African Federation of Trade Unions (Saftu) esanda kusungulwa, ehlome ngoMnu Zwelinzima Vavi oxoshwe engunobhala-jikelele weCosatu. Siyakuqonda ukuthi ngeke uyishiye ngaphandle ipolitiki uma ubhekana nezinkinga zezisebenzi kodwa ukungena shi kweCosatu kwezepolitiki, kwenza ihlohlwe “ngekuqashelwe”.
Sikhuluma nje izinto okuyizona ezibalulekile ezisebenzini, okuyisikhathi sokusebenza, yinhlalonhle yazo namanje kusakhulunywa ngazo ukuthi kazihambi kahle kodwa ikhona njalo belu iCosatu nezinye izinyunyana. Ukugubha usuku lwezisebenzi kusekhona abantu abasebenza amahora angaphezulu kwayisi-8 bangayinikwa imali yesikhathi esengeziwe, ukuhola imali ephelela ematekisini kuyiwa emsebenzini, ukuxhashazwa kwezisebenzi zasemapulazini, ezezinkampani ezizimele ngisho nakuhulumeni, yizinto zemihla ngemihla kodwa izinyunyana zimatasa nokungena zize zigamanxe kwipolitiki. Siyafisa ukuthi izisebenzi zike ziteleke ukukhokha imali yobulunga ezinyunyaneni, mhlawumbe abaholi bazo bangalibala kancane wungena shi kwipolitiki baze bakhohlwe wusizi lwazo.
Kakusizi ukuthi izisebenzi zijabulele ukugibela amabhasi amahhala ziya emgubhweni wosuku lwazo kodwa zibe zazi kahle kamhlophe ukuthi isimo sazo ngokomsebenzi namaholo kasihambi kahle. Nabaqashi siyanxusa ukuba bapheze ukuxhaphaza izisebenzi ngoba nakhu bazi kahle ukuthi indaba izophelela emoyeni ngenxa yezisebenzi zezinyunyana ezigwinya amantshontsho bese ziwuhlaba inhlali. Ziningi izisebenzi ezixhashazwa ngabaqashi zibe zingamalunga ezinyunyana, zikhokha zinyanga zonke imali yobulunga kodwa zigcina zingasizakalanga. Abaholi bezinyunyana mabayeke nabo uqobo ukuxhaphaza izisebenzi begxambukela ekuqashweni kwazo emikhakheni ethile.
Sekukaningi kusolwa ubuholi beSouth African Democratic Teachers’ Union (Sadtu) ezindaweni eziningi ngokugxambukela ekuqashweni kothisha. Kokunye kuze kukhulu-nywe ngeyokugwaziswa kothisha abathile ukuze bathole imisebenzi nezikhundla. Besifisa ukuba izinyunyana zishintshe ukusebenza kusukela kulo nyaka, zethembeke emalungeni azo. Sikhuluma nje izisebenzi zaseGauteng zibhoboka amaphakethe yi-e- toll, iCosatu yazwakala ihhumuzela kodwa kwabuye kwathula. Siyazi ukuthi kukhona okuhle izinyunyana ezikwenzele izisebenzi kodwa kubukeka sengathi kuningi kakhulu okubi okuzehlelayo bese kuthuleka nje.
Abantu mabangasebenzisi ubuholi bezinyunyana ukuzi-tholela izikhundla zokunombela ukuze bagcine besephalamende. Lolu hlobo olungena ephalamende kade lusezinyunaneni, luyaxaka ngoba luzwakala lumpongoloza lusohlangothini lwezisebenzi uma lusacathamela isikhundla kuhulumeni kodwa uma seluphakathi, luthula sengathi kalukaze luthi vu. Isimo sezomnotho eNingizimu Afrika sithanda ukuba sibi, okungaholela ekudilizweni kwenqwaba yezisebenzi ezinkampanini ezahlukene, wukunyuka kwentengo ezidingweni zomphakathi nokunye, ngakhoke sibona kusezandleni zazo izisebenzi ukukhomba indlela ezifuna ukuthi izinyunyana zisebenze ngayo ngoba phela njengoba osopolitiki behlale besho ukuthi abaqashi wumphakathi, abaholi bayizisebenzi, kunjalo nasezinyunyaneni.