LUSAZOSIKINATELA USIZI UMA SISATHANDA IMALI
NGIYANIBINGELELA bazalwane bami abahle egameni lobusika obuholela ekubeni kuzalwe inqwaba yezingane, abantu bazale baze bakhohlwe wukuthi kabanawo ngisho nama- bank account, labo abanawo bazale baze bakhohlwe wukuthi kuma- account abo kufuywe inqwaba yo- zero.
Nginibingelela nje, kade ngihlabe ikhefu, izinto eziningi bengingazinakile, bengizivalela endlini kwazise nobusika sebuqalile... okungasho-ke ukuthi labo gcobizisu izinkaba zabo ezikoPixley KaSeme Street (West Street) bese bethi thina zinsizwa zasemakhaya uma siselivini siba kwihibernation.
Kangazi ukuthi siya kwi- hibernation siyizinkonjane yini noma izintuthwane... lezi zakudala kodwa ngoba lezi zamanje uzithola zizitika ngoshukela ubusika buhambisana neqhwa. Ngiyethuka nje uma ngibuya ekhefini ungqongqoshe wamaphoyisa omusha, u-Arrived Mbalula ese-trenda njengalaba befundisi abangamanomad.
Phela bagxumeka amatende ezindaweni ezahlukene njalo mhla zingama-24, balibhoncule mhla zintathu enyangeni elandeyo ngoba imiholo isuke isiphelile, bese befutha abantu ngamaMr Min ngoba bethi ukukhazimula kweNkosi kuzokwehlela kubona.
Hheyi uyabona usizi iNkosi impela, luze ludale ukuba abantu bavume ukubangisana namatafula namakhabethe ngeMr Min! Lolu sizi lwafika nemali. Hhayi bazalwane, ngiyamvuma uSathane, ubagobe uphondo abantu, uyayisebenzisa imali ukubahlukumeza kodwa bona bezitshela ukuthi bacebile.
Haleluya! Uma ufuna ukubona imizwa eyiqiniso yomuntu omnyama e-Afrika, ungayi ethaveni, enkundleni yezemidlalo, egigini likaMahlathini namaHhotela Chefs, shona ebhenki eliphelezelwa ngama-ATM kusukela mhla zingama-25 enyangeni kuze kuyoba mhla zintathu, uzobona imihlola.
Umuntu uya kwi-ATM ngejubane ubona nje ukuthi emehlweni ugcwele ithemba. Uyothi umbona, useyanyobozela wena owabona ufudu luwela endleleni yesintu ingongoni ishisiwe, ihlungu lingakaqhumi. Usehamba ubheke phansi ufunda i- slip esiphume kwiATM.
Usizi lubhalwe ngama- capital letters ebusweni lwaze lwa-underlayinwa. Omunye uze ademelayise athi: “Yinja ngempela lo mlungu akasangifakeli ngisho u-R2 pho ukuze kube khona into ezosala ihlobise i- account yami!” Abanye umuntu uze aphelelwe yisineke sokulinda kwi-ATM ayigaklaze ngequpha nangonyawo ngoba ezitshela ukuthi isimimilite ikhadi lakhe kanti lutho - injalo nje ibhalile ukuthi “linda ngisakubhekela ukuthi unamalini.” Ivele ibhale ukuthi: R00.00, ubone ukuthi ukube umsunguli we-ATM ubengumZulu, ibizobhala ukuthi: “Uyagula yini wena, ingani uyazi nje ukuthi kawunamali?
Nidla imali nezifairbeh la bese nicabanga ukuthi kukhona ezoqathaka kwi-ATM njengeManna!” Uyombona umuntu esecwebezela emehlweni uze uzibuze ukuthi uxhoshwe yini kanti udidwe ngo-0 laba abagcwele i- bank statement, useyakhala.
IManna yagcina ngabantwana bakwa-Israel eBhayibhelini, le mali umuntu usuke eyidla ethenga ngayo iziqatha, esephenduke i-NGO yamantombazane elokishini ewahlinzeka ngotshwala bamahhala. Abesilisa nje bona, ungafunga ukuthi yi- federalist, inyoka, kwazingane kazaziwa ukuthi zidleni noma zigqokeni uma kunemali.
Into eyaziwayo nje wukuthi ngabe uLulu noBongiwe balale bedakiwe yini izolo. Uma ingasekho imali kwi-ATM, umuntu umbona eseqhatha usizi ehamba egudluza abantu edolobheni ngoba ingqondo ibishe ezikweletini azidalile. Phela angithi izimambana lezi utshwala kazisabukweleti kwa-Anti Thoko, laphaya kuSarjoo Road zithi “Thoko is old School” sezibukweleta ezitolo ezinkulu ngamakhadi akhona kanti nakwezinye izitolo zinezikweletu zezingubo, zithi zivuka ekuseni ngosuku lokuhola o-Elgaz, Sales House noBee Gee sebezithathele imali abakweletwa yona.
Umuntu asuke kwi-ATM esosizini enjalo aye esangomeni. Nalezi zangoma zamanje ezihlola ngoShareit noWhatsApp, zimkhohlise zimtshele ukuthi imali yakhe kayihlali nje, yingoba uthunyelelwa nguGumede umakhelwane wakhe ngamagundane ukuba ayithathe.
Naye-ke umuntu usezobona ukuthi yiqiniso lokhu okushiwo yilo mphuphe wesangoma ngoba vele uke awabone amagundane kwakhe “hhiya kusho ukuthi asuke ethunywe nguGumede” ebulawa wubuwula, yimuphi umuzi ongenalo igundane? Umuntu ozothi igundane kalikho kwakhe makavele, sizothumela iNumsa noma iNehawu bayowa-bheka, ingani izinyunyana kazizwani namagundane. Useyonyonkolozwa uGumede wabantu-ke kwazise vele namacharacteristic abantu abakhunkulayo unawo.
Mnyama, mude, uqatha, unamehlo abomvu, uhlale ehlinile, akazwani nezicathulo, uhlale ephethe ucelemba, izandla zakhe zineminkenke, uyakuthanda ukuchatha etc.
Bazalwane, uma sisathanda izinto ezihambisana nemali, usizi lusazosikinatela uzofica umuntu esenemibimbi yesalukazi esineminyaka engama-80 esiyi-Arawak Indian kodwa yena eneminyaka engama-28 ubudala.
Masikhulekele into eyodwa nje qwaba, ukuthi uSathane aphenduke bazalwane, asindiswe, abe ngumntwana kaNkulunkulu then sizoyi-enjoya kamnandi le mali, ngeke iphele kuma-akhawunti ethu.Njengoba-ke uSathane esagcwele amathafa, klibhi klolo, nisazoqhubeka nje nokushiya amaATM emangele ukuthi asekhahlelelwani manje ngoba isithunywa kasoni, wona asuke ephathisiwe imali yethu. Hikhensile ngopfu ma-Afrika!