U-IGESUND USIKAZA UKUTHI KHUMU EKUQEQESHENI KWI-PSL

ANGASE athathe umhlalaphansi ekuqeqesheni amakilabhu agijima kwi-Absa Premiership uGordon Igesund ( osesithombeni) okhonjwe indlela yiHighlands Park ikhala ngokugqoza kwemiphumela.

Ligqabukile igoda phakathi kweHighlands no-Igesund emuva kokuba le kilabhu iguqiswe yiBidvest Wits ngo-2-0 koweligi ngoLwesihlanu ebusuku eMakhulong Stadium, eTembisa.

Lo mqeqeshi oke wacija neBafana Bafana uxoshwa nje, ubesanqobe imidlalo emibili nje kuphela selokhu ethathe izintambo zokuqeqesha ngoMfumfu (October) ku-Allan Freese ofake le kilabhu kwiPremiership.

ILANGA lihletshelwe ngumthombo walo osondelene noIgesund ukuthi angase athathe umhlalaphansi ekuqeqesheni esigabeni esiphakeme kwazise usehlale isikhathi eside futhi wazuza okuningi. Lo mqeqeshi ubambe irekhodi lokunqoba izicoco ezine zeligi namakilabhu ehlukene kwiPremier Soccer League (PSL) okuyinto engakaze yenziwe ngomunye umuntu.

“Ngigcina ukukhuluma naye ungitshele ukuthi usekwenze konke ekuqeqesheni esigabeni esiphakeme ucabanga ukuthatha umhlalaphansi abhekane nokuthuthukiswa kwebhola emazingeni aphansi. Nokho sizobona ngoba abaqeqeshi bangomalal’ ephenduka,” kusho umthombo ocele ukuba igama lawo lingadalulwa.

Imizamo yokuthola u-Igesund ukuba aphawule kulolu daba iphunzile njengoba ucingo lwakhe belukhala kodwa lungabanjwa.

UMike Makaab wakwaProsport International, okuyinkampani ephethe izindaba zika-Igesund, wale waphetha ukuphawula ngodaba lwalo mqeqeshi wathi lumethusile.