AMAKHADI ABOMVU KUSUSWA I-DOWNS ESICONGWENI
USALOKHU uvulelekile umbango oshubile wesicoco se-Absa Premiership esivikelwa yiMamelodi Sundowns esuswe kabuhlungu esicongweni yiBidvest Wits iyiguqisa ngo-1-0 wegoli likaBen Motshwari alingqofele enethini ngomzuzu wama-42 izolo ngoMsombuluko kusihlwa eBidvest Stadium, eGoli.
Kulo mdlalo kukhishwe ngekhadi elibomvu uFares Hachi weDowns ngomzuzu wama-80 noDaine Klate weWits ngowama-83. Bobabili laba badlali bathole amakhadi amabili aphuzi yize bebengene ngesiwombe sesibili ngokwahlukana. UHachi ungene endaweni kaThemba Zwane kanti uKlate uvale isikhala sikaMogakolodi Ngele.
UPitso “Jingles” Mosimane ololonga iSundowns ukhale ngamathuba abawamoshile. Nokho ubonge abadlali bakhe ngokuzinikela njengoba sebeshoshele baze bangena shi embangweni weligi.
UGavin Hunt weWits uncome intuthuko ayibona kwezakhe kusuka ezijoyine kumasizini ambalwa adlule. Uthi bazolwela ukwenza kangcono kakhulu nonyaka kunangamasizini adlule abahluleke kancane kuwona ukunqoba iligi.
Komunye umdlalo obuyizolo, iMaritzburg United inyomfe izinhlelo zeCape Town City kwiligi iyiguqisa ngo-1-0 wegoli likaKurt Lentjies elingene ngomzuzu wama-86 eHarry Gwala Stadium, eMgungundlovu. Ukuhlulwa kweCity kuyiphazamisile njengoba nayo ilwela ukunqoba iligi. Nokho kube yizindaba ezimnandi kwiTeam of Choice iqinisa indawo yayo kwi- top 8.
U-Eric Tinkler ocija iCity, ukhwele wadilika kubadlali bakhe ebasola ngokudlala umbozo webhola.
“Ngikholwa wukuthi ithuba lokunqoba iligi selishabalele manje, sesisele emjahweni. Kodwa-ke ngigxeka abadlali bami, akukho abakwenze kahle. Konke engibatshele kona abakwenzanga.
“Bebephisana ngamabhola benhlakanhlaka kungathi kabafuni ukudlala. Kwale ngisho ngibathethisa ngesikhathi sekhefu babuya benza okufanayo. Kuzofanele sishintshe ukwenza uma sifuna ukwenza kangcono kwiligi,” kusho uTinkler. UFadlu Davids ololonga iMaritzburg, uthi konke kuhambe ngokohlelo.
“Ngicabanga ukuthi into engibadidise ngayo wukushintsha isikimu ngibophele abafana abancane bavele benza into yamehlo. Ngijabule ngomphumela, wenze sanethemba ngendawo kwi-top 8,” kusho uDavids.
Kwale ngisho ngibathethisa ngesikhathi...