IZIMBANGI ZISONGA NGOKUDUNGA UMCIMBI WETHANDA ROYAL ZULU
Siyayidinga nathi le wini ukuze siqinise indawo yethu yokuya kuma...
LINGASE lishone elakusasa ngoLwesithathu iKwaZulu-Natal seyinamakilabhu amathathu agijima kwi-Absa Premiership.
IThanda Royal Zulu izobhekana neStellenbosch FC koweNational First Division (NFD) kusasa ngoLwesithathu ngo-15h00 eRichards Bay Sports Complex.
IThanda iya kulo mdlalo nje, ngeSonto iguqise iMagesi FC ngo2-1 koweligi kuyo le nkundla. Le wini ibeke iThanda ethubeni lokungena igijima kwiPremiership.
Ukuze iThanda ingene esigabeni esikhulu kusasa kufanele inqobe iStellenbosch bese iRoyal Eagles ihlula iBlack Leopards emdlalweni okusasa ngo-15h00 eHarry Gwala Stadium.
Amakilabhu asesethubeni lokufica iThanda ngokwezibalo yiStellenbosch, yiLeopards namaZulu FC azobhekana neMilano United namuhla ngoLwesibili ngo-15h00 e-Athlone Stadium, eCape Town.
Ukuze la makilabhu abambe iThanda kufanele ayinqobe yonke imidlalo yawo esele bese iThanda ihlulwa kuyo yonke okubukeka kungeke kwenzeke njengoba sekusele imidlalo emine nje kuphela kusongwe iligi.
USifiso “Jomo” Biyela, oyisikhulu esiphezulu kwiThanda, uthi kuzosala amakhokho enkundleni kulo mdlalo weStellenbosch ngoba noma kanjani kufanele bawunqobe.
“Sisonga umzuliswano wokuqala sidlale neStellenbosch eku- hambeni sasehlula. Kulokhu-ke sidlalela ekhaya noma kanjani kufanele lo mdlalo siwunqobe. Sisethubeni lokuthi kushone ilanga sesidlala kwiPremiership.
“Lo mdlalo ufike kahle kubuya uMphakamiseni Nene esigwebeni samakhadi. Konke kumi ngomumo siwulindele lo mdlalo,” kusho uBiyela.
USammy Troughton, ocija iStellenbosch, uthi kakuselula ukuba bayibambe iThanda kodwa ngeke bayilekelele ihambe kalula.
“Siyayidinga nathi le wini ukuze siqinise indawo yethu yokuya kuma- play off.
“Umdlalo ngeke ube lula kodwa sizokwenza konke okusemandleni ukuwunqoba. Siyihlomele iThanda futhi siyayazi lapho ibuthaka khona,” kusho uTroughton. E-Athlone: Milano vs AmaZulu 15h00.
E-Athlone: Santos vs Jomo Cosmos 15h00.
EMhlathuze Sports Complex: Thanda vs Stellenbosch FC 15h00.
EHarry Gwala: Eagles vs Leopards 15h00.
Kanyamazane: Mbombela vs FC Cape Town 15h00.
E-Old Peter Mokaba: Magesi FC vs Cape Town All Stars 15h00.
EMthatha: Mthatha Bucks vs University of Pretoria 15h00.
ESugar Ray Xulu: Real Kings FC vs Witbank Spurs 15h00.