BAGEQE AMAGULA ABABULALE ONGABONI
Babulale ongaboni
USINDE ekubuyeni eSwaziland eshaya ngesudi yesele usomabhizinisi waseNdabeni eManyiseni, enyakatho-mpumalanga yeKwaZulu-Natal onukwe yizangoma zaKwaLomahasha kwelikaMswati, zamgunda zamshaya isiphambano ekhanda.
Kuvela ukuthi uMnu Vusi Kappa Dlamini usindiswe wukukhokha inhlawulo ka-R1 000 ukuze kudedelwe izimpahla zakhe. Uhambo lwaKwaLomasha belusingethwe ngamadoda ahlonishwayo eNdabeni, abeqokwe wumphakathi njengoba kuyiwona oshaye imali yokuyobhula.
Ngaphandle kokunukwa kwalo somabhizinisi, kubuye kwanukwa noMnu Nhloko Mathenjwa, obengekho emhlahlweni. Laba baveze ukuthi bambulale kanjani uMnu Mathendele Nsimbi obengaboni emehlweni. UMnu Nsimbi utholwe eseshonile mhla zingama-28 kuNdasa (March) emuva kokunyamalala zingama-28 kuNhlolanja (February).
ILANGA libike kabanzi ngodaba lokunyamalala kwakhe watholakala ecwiyiwe. Ingalo, isitho sangasese bekungekho, ikhanda lihlahlelwe kwakhishwa ubuchopho. Umphakathi uphume neqhinga lokuba kuphunywe inqina kuyofunwa kuwona wonke amahlathi agudle imizi yaseNdabeni kodwa lutho ukumthola.
Emuva kwalokho uphakamise ukuba kuyohlolwa kwabanamanga. Nakhona lapho kuphunywe ekamabuyaze. Ekugcineni sekutholakale isidumbu, kushaywe enye futhi imali yokuba kuyiwe emhlahlweni eSwaziland lapho zifike zanuka uMnu Dlamini nalona omunye wesilisa.
Luze lufinyelela esiphethweni nje lolu daba, beselusingethwe ngamasosha aseSwaziland ngesizathu sokuthi isidumbu sikamufi sitholwe entabeni esemngceleni weNingizimu-Afrika neSwaziland khona eManyiseni ngemuva kokuba iphisi elaziwayo eNdabeni lizithele phezu kwaso sifakwe emgedeni ophakathi kwamawa.
ILANGA lithole ukuthi udaba lu- suke ngokuthi umphakathi uqale ukuvungama ngoMnu Dlamini obengafuni ukubambisana nawo uma kuyofunwa umufi.
UMnu Dlamini utshele umphakathi ukuba uyothatha ingxenye yezicubu zikamufi emzini wakhe. Phakathi kokunye kuvele ukuthi ubuchopho nesitho sangasese kunikezwe inyanga edumile yaseJozini esigodini saseMakhonyeni obekufanele kube yiyona ezokwenza umsebenzi wokuqinisa isitolo sikaMnu Dlamini.
"Ngiyaxolisa kakhulu emphakathini wakithi nakuso sonke isizwe sakwaMathenjwa, bengingazi ukuthi kuzogcina kuvele obala. Impela yena umufi samthatha sayombulala samcwiya maqede samphonsa eweni entabeni.
"Ngicela intethelelo emphakathini. Zinginukile vele KwaLomahasha," kusho uMnu Dlamini. UMnu Mathenjwa uthe yena ubengakucabangi ukuthi kuzogcina kufinyelela kulesi sigaba, kube lula ukuvuma ngesikhathi ekhohliswa nguMnu Dlamini omthe-mbise ukuthi uzomnika u-R6000 ukuze amlekelele basoconge umufi.
"Mina niyangibona nje mphakathi wakithi, ngiyazihluphekela. uKappa, wasebenzisa ukuhlupheka kwami ukungiholela oPhathe ukuze sikhiphe umphefumulo kaMathendele," kusho uMnu Mathenjwa.
Kulapho kugezeke khona igama lenyanga edumile kuyona le nda-wo, uMnu Sfiso "Thokoza" Mathenjwa, ongumfowabo kaNhloko. Le nyanga ithi ibonga abakubo ngoba ekugcineni kugezeke igama layo kwabanjwa umfowabo naye obesolwa.
"Bese ngimubi okomthakathi lapha endaweni. Ngibonga ukuthi ekugcineni lihlanzekile igama lami. Kakukho okuningi engizokusho ngomfowethu, yindoda nayo indala mayizibonele," kusho uMnu Mathenjwa.
Umntwana omkhulu wesizwe sakwaMathenjwa uMnu Japhet Mathenjwa, uthe ibambe ngakho njengoba kudala kukhalwa ngalesi sihlava. Uthe nakuba sekwavalwa ukuyobhula kodwa bona kabanankinga nabantu abasakholelwa emihlahlweni.
"Kudala sikhala ngale nkinga yokulahleka kwabantu maqede batholakale sebeshonile becwiyiwe. Sikholwa wukuthi laba basazokhipha nabanye obhululu babo abagila nabo le mikhuba.
"Ubukhosi kabuhambisani nokubhula kodwa futhi kasinankinga nabasakholelwa kukhona ngoba kuyilungelo labo uma bebona ukuthi kuzoxazululeka izinkinga zabo," kusho uMnu Mathenjwa.
Okhulumela umndeni wakwaNsimbi, uMnu Nkosini Nsimbi ongumfowabo kaMathendele -uthe:
"Kubuhlungu okwenzeka kimina ngoba laba bantu singomakhelwane nabo kodwa bona bakwazile ukukhipha isidumbu khona lapha ekhaya. Sifuna inhlawulo enkulu kakhulu ngoba kuzofanele 'bamlobole' umfowethu.
"Khona sibonga kakhulu nomphakathi wakithi ngokubambisana nathi kwaze kwaba kuvela ababulali bomfowethu.
"Siphinde sibonge namasosha aseSwaziland ngoba akhuphuke intaba azobambisana nathi nomphakathi kulolu daba futhi abeguduza nathi emahlathini sisafuna isidumbu somfowethu," kusho uMnu Nsimbi.
ILANGA lilobe lolu daba izolo amaphoyisa esiteshi saseNdumo enyakatho-mpumalanga yeKwaZulu-Natal ematasa ezama ukuvikela uMnu Dlamini umphakathi ufuna ukumudla luhlaza ngesikhathi ehlanza iqiniso.
Amalunga omphakathi abuye ashaya izimoto zamaphoyisa ngoba efuna abasolwa.
ILANGA lilobe izolo umuzi kaMnu Dlamini nowakubo kaMnu Mathenjwa ishunqa emuva kokushiswa ngamalunga omphakathi.