Izinhlangano zibhikishele i-WEF
Zithi ngeke ibasizwe ngaluthoi abantulayo
BADELE amakhaya baqoma ukuyobhikisha abantu abaqhamuka ezinhlanganweni ezahlukene KwaZulu-Natal bephikisana nokuba khona kwengqungquthela eyaziwa ngeWold Economic Forum (WEF) eqale izolo ngoLwesithathu eNkosi Albert Luthuli International Convention Centre (ICC), eThekwini.
Ababhikishi basukele eCity Hall behambisa uhlu lwezikhalo e-ICC - yize begcine bephelele ngase-Exhibition Centre ngakhona e-ICC.
Bebekhala ngokuthi le ngqungquthela kayibasizi ngalutho abantu abahluphekile baseNingizimi Afrika. Bathi izinqumo ezizothathwa kuyona akukho okuphusile okuzozuzwa ngabantu abantulayo bakuleli kodwa kuzohlomula abaphezulu, abangabakhathelele abantu abadla imbuya ngothi.
Ababhikishi bafuna uhulumeni ufeze izidingo zabantu, ungagcini nje ngokukhuluma kodwa kungenzeki lutho. Iningi labantu ebelibhikisha, bekubonakala ukuthi kalihambisani neze nokuba khona kwale ngqungquthela njengoba belifake izikibha ezibhalwe ukuthi “World Economic Fraud”.
UMnu Sizwe Shiba weMayine Azanian Movement, uthi bengamalunga omphakathi bakhathele wukubukela izikhulu nabaholi bezombusazwe bedlala ngabantu.
Uthi babone kungcono babhikishe ngalolu suku okuqala ngalo le ngqungquthela ukuze kuzobonakala ukuthi kabahambisani neze nayo.
“Into eyenza ukuthi sikhale kakhulu ngale ngqungquthela wukuthi abantu abahlwempu kayibasizi ngalutho. Okubuhlungu wukuthi abantu emakhaya kabazi nokuthi isho ukuthini yona le World Economic Forum.
"Lokhu kwenziwa wukuthi bahlanganela ezindaweni eziphezulu lapho amalunga omphakathi engavumelekile khona, bese kusayinwa izivumelwano ezigcina zingasisizi ngalutho thina esihluphekayo.
"Lapha eNingizimu Afrika sinenkinga yokuntuleka kwemisebenzi, kunezingqinamba eziningi ezibhekene nentsha nemiphakathi kodwa uma kuphela le ngqungquthela, akukho okuzoshintsha, ngeke sisezwa lutho ukuthi isilekelele ngani.
"Sekukaningi uhulumeni wenza izethembiso ezigcina zingafezwanga.
"Nakhona kule World Economic Forum, kuhlanganwa namanye amazwe kusayinwe izivumelwano kodwa ekugcineni uma sekunezikweletu okuthiwa zenziwa yizwe, kufanele kukhokhe thina kukhuphuke intela.
"Lokhu kuyasikhathaza ngoba sisuke singekho kuvunyelwana futhi sisuke singekho uma sekukhona abahlomulayo abevele benemali,” kusho yena.
UMnu Mvuzo Ntombela woBunye bamaHostela, uthi nabo babone kungcono babe yingxenye yalo mbhikisho. Uthi abantu kusafanele bafundiswe ngalezi zingqunqguthela ngoba kabazi nokuthi zisho ukuthini.
“Ngabe kungcono ukuba le ngqungquthela iyiswa emiphakathini ngoba kusuke kuyokhulunywa ngezinto abathi bahlose ngazo ukuthuthukisa umnotho. Okubuhlungu wukuthi uma ngingasuka lapha ngiyongena lapho kuhlanganelwe khona, ngingakhishwa ngesankahlu ngoba kangivumelekile, okusho ukuthi umuntu ohluphekile njengami akumele abe yingxenye yayo, kuvumeleke kuphela abantu abagqoke amasudi, abasezi-khundleni eziphezulu. Esifuna ukukwazi wukuthi thina bantu abasha esingasebenzi, kusisiza ngani lokhu,” kusho uMnu Ntombela.
Esethula inkulumo yakhe ezithunyweni ebezithamele le ngqungquthela, uMengameli Jacob Zuma, uthe leli lizwe lifisa ukuba lenyuse izinga lokutshalwa kwezimali ngamazwe angaphandle.
Ubuye wabikela izithunywa ukuthi kusukela mhla lulunye kuMandulo (September) wezi-2015, iNingizimu Afrika inqume ukuba ukushaywa kwemithetho esikhathini esizayo kulawulwe wukuhlaziya imiphumela engase ibe khona kwezomnotho nenhlalo yomphakathi ngaphambi kokuba iphasiswe.
Wenezele kuleli phuzu ngokuthi umbono weNational Development Plan Vision 2030 yiwona owumhlahlandlela entuthukweni yomphakathi kwezomnotho.
Uphawulile futhi nangemikhakha emisha engase ihlinzeke amathuba kwiForeign Direct Investment, ika-khulu i- green economy, uwoyela, isisi ( gas) nezomnotho wasolwandle njengokwakhiwa kwemikhumbi.