UXOSHELWE UGWAYI NOKULALA ESIKOLENI
UJIKA nelanga ekhaya umfundi waseGeorgetown High School, e-Edendale, eMgungundlovu, maphakathi neKwaZulu-Natal, oxoshelwe ukutholakala nogwayi esikhwameni sakhe ngaphakathi esikoleni sekuzovalwa izikole ngoNdasa (March).
UNkosinathi Ngcobo (19) utshelwe ngabaphathi besikole ukuthi makabuye ngonyaka ozayo esikoleni.
Uthi uxoshiwe kwathiwa makalande abazali bakhe. Bamxolisele abazali wavunyelwa ukubuyela ekilasini kwaqhubeka ukufunda njengokujwayelekile.
Kuthe uma kuvulwa izikole saqhubeka kahle isimo kanti uzofikelwa wubuthongo kufundwa, isekela likathishanhloko lamxosha lathi kumele ayobonana nosonhlalakahle ukuze kuzohlolwa igazi lakhe ukuthi zingakanani izidakamizwa kulona.
“Ngihambile ngaya kosonhlalakahle ngabuya nencwadi echaza izinsuku nezikhathi okumele ngibe yingxenye yamakilasi ngazo ngoba bathi kalihlolwa igazi ngaphandle kokuchazelwa kabanzi ngezinto eziningi ezithinta ukuzibandakanya nezidakamizwa.
“Ngibuyelile esikoleni naleyo ncwadi bangixosha bathi bafuna incwadi enemiphumela yokuthi ngiyabhema yini ukuze bezongithathela izinyathelo,” kusho uNkosinathi.
Ethintwa unina kaNkosinathi, uNkk Lindiwe Ngcobo, uthi kumphathe kabi ukuxoshwa kwengane yakhe nakuba bese lulungisiwe udaba washweleza esikoleni.
Uthi ngesikhathi eseziyele mathupha esikoleni, uthishanhloko uthe umfundi kuzomele ahlale ekhaya ngoba izinsuku zokubonana nosonhlalakahle ezibhaliwe ziningi kakhulu, zizomphazamisa ezifundweni zakhe.
Okhulumela uMnyango wezeMfundo KwaZulu-Natal, uMnu Kwazi Mthethwa, uthi akekho uthisha onelungelo lokuxosha umfundi ngaphandle kwenhloko yomnyango wezemfundo.
“Siyakugxeka kakhulu lokho ngoba akekho uthisha onalelo lungelo. Sizoxhumana nabahloli uma sesithole umbiko bese siyangenelela,” kusho uMnu Mthethwa.