KUHOXISWE ICALA BENGAYANGA ENKANTOLO
USOLA isandla semfene owesilisa waseMtubatuba, ogwini olusenyakatho yeKwaZulu-Natal ngokuhoxa kwecala lokudutshulwa kwakhe nozakwabo abathathu nyakenye.
Lona wesilisa - ocele ukungadalulwa ngoba esaba ukuthi hleze asocongwe - uthi kuduma ikhanda uma ecabanga ngokuhoxa kwecala ekubeni bengaziswanga futhi bengakaze balubhade ngisho enkantolo.
Uthi konke lokhu kuqale nyakenye ngesikhathi bedutshulwa ngumuntu thizeni besemsebenzini njengoba besembonini yamatekisi. Kwenzeka lesi sigameko nje bebesemgwaqweni begade umsebenzi.
Uthi kuqhamuke imoto thizeni yathatha abantu abebemile eceleni komgwaqo becela “ukubelethwa”.
Uthi bayilandelile le moto ngoba (ngokwabo) kakuvumelekile ukuthatha abantu abasuke bemi egwaqweni kwazise asuke ekhona amatekisi athutha abantu.
“Siyilandelile le moto, okuthe sisendleleni sahlangana nemoto yamaphoyisa (ebihamba iphoyisa). Le moto ebicosha abantu ijikile yaya ephoyiseni, umshayeli wayo walimisa.
“Siye ephoyiseni ukuyoxoxa nalo nomshayeli wemoto ebicoshe abantu. Sithe singakafiki nje kulona, lo muntu wavele wadonsa isibhamu phambi kwalo iphoyisa, wavulela ngenhlamvu ebhekise kithina.
“Mina bengingemuva, kuthe uma ngibona uzakwethu ewa, ngaphuthuma kuyena ngizama ukubona ukuthi ulimele kangakanani. Ngisanake lokho, ngizwe kunento engishaya kabuhlungu esiswini. Ngenxa yokuqhuma kwesibhamu, ngibalekile. Kuthe sengisendleleni kwayima ngibona ukuthi ngidubulekile.
“Ngijikile ngaphindela endaweni yesigameko kodwa ngafika engasekho obesidubula esebaleke nephoyisa. Sidubuleke sonke, oyedwa wozakwethu washonela endaweni yesigameko. Singeniswe esibhedlela ngahlala isonto lonke njengoba inhlamvu ibibhajwe ngaphakathi,” kusho yena.
Uthi ngesikhathi bedutshulwa, akukho noyedwa kubona obephethe isibhamu obekungenza umshayeli wemoto adubule.
Utshele ILANGA ukuthi lokhu kungafakazelwa nangamaphoyisa ngoba kasikho isibhamu asithole kubona ngesikhathi bedutshulwa.
Uthi osekubaxaka kakhulu wukuthi bathole ukuthi icala selihoxile. Uthi bazizwa bengaphephile ngoba umuntu obadubulile usazicanasela ngaphandle kanti usengabuya ayoqedela into abeyiqalile.
Okhulumela amaphoyisa KwaZulu-Natal, uCapt Nqobile Gwala, uthi ukhona umsolwa oboshiwe ngaleli cala kodwa lahoxa eNkantolo yeMantshi yaseMpangeni.
Uthi uma benezikhalo ngokuhoxa kwecala, kumele baye kwiNational Prosecuting Authority - NPA) ukuze bezothola isizathu. Uthi yiNPA kuphela engakhipha umyalelo wokuba icala livulwe kabusha uma bebona kunesidingo.