Umsindo ngesenzo semeya yaseMdoni
Isolwa ngengwijikhwebu kwelemenenja
KUSUKE umsindo ngesenzo seMeya yaseMdoni, eningizimu yeKwaZuluNatal sokuhoxisa isinqumo esithathwe yisigungu samakhansela ngoLwesihlanu lomhla zingama-21 kuMbasa (April) sokumisa emsebenzini imenenja kamasipala.
UMnu Thabani Dube oyimeya, kuthiwa ushaye ingwijikhwebu enqaba ukusayina nokunikeza imenenja kamasipala, uMnu Xolani Luthuli, incwadi yokuyimisa emsebenzini okuyisenzo esingehlanga kahle emaqenjini aphikisayo kumasipala.
UMnu Luthuli ubhekene nezinsolo zokukhwabanisa ezivezwe yikomidi langaphakathi, iMunicipal Public Accounts Committe (Mpac). Isinqumo sokummisa sithathwe ngamakhansela emuva kokuzwakalisa ukunganeliseki ngemibiko ethile yangaphakathi lapho kuvela ukuthi kunamathenda emigwaqo abebekelwe imali elinganiselwa ku-R 5 million kodwa izinkampani zagcina ziqokwe ngebalelwa ku R9 million kuya ku R14 million.
Ngaphezulu kwalokho, kunemali esondele esigidini okubikwa ukuthi inyamalele emnyangweni wezamalayisensi, okungaveli ukuthi ishonephi futhi kalukho uphenyo olwenziwayo ngalokho kepha kunabantu abathile abasusiwe kulo mnyango bathunyelwa kweminye ngaphakathi kumasipala.
Incwadi ebhalwe yimeya ILANGA elinayo ikhophi yayo eyethulwe emhlanganweni wamakhansela ngoLwesithathu olwedlule, iveza ukuthi imeya ithi ngeke iyi- sayine incwadi yokumisa uMnu Luthuli ngoba ibingekho yona kunqunywa ukuba amiswe futhi kayinikwanga isikhathi esanele sokucubungula izizathu zokummisa.
Ithi nomhlangano okuthathwe kuwona leso sinqumo ubungekho emthethweni njengoba amakhansela ebizwe ngomqhafazo futhi nesikhathi anikwe sona kube ngamahora angama-24 ngaphambi komhlangano besingenele.
Kule ncwadi imeya iveza nokuthi emuva kokuba amakhansela evumelene ngokuba abhalele imenenja incwadi eyimisayo kodwa lokho kakuxoxwanga naye ngomlomo kasomlomo, uMnu Siyabonga Khwela, ongusihlalo wesigcawu samakhansela.
Ithi ngaphezu kwalokho, incwadi ebibhalelwe uMnu Luthuli ibingenazo izinsolo abekwa zona njengoba nabameli bakhe bebhalele umasipala befuna ukwazi ukuthi umiswa ngaziphi izinsolo. Imeya iphike yalala ngomhlane ukuthi incwadi eyibhalile ibinqanda ukumiswa kukaMnu Luthuli yathi ibeke izizathu zayo mayelana nokuthi kungani ingayisayini kumbe iyi- bhale incwadi yokumisa imenenja.
"Yingakho-ke sinqume ukuludlulisela eMnyangweni woMgcinimafa KwaZulu-Natal lolu daba ngoba sifuna luphenyisiswe kabanzi ngumuntu ozimele, ongekho kumasipala ukuze sithathe isinqumo esifanele" kusho imeya.
Ithi ngokwenza lokhu kabawu- deleli umbiko weMpac wukuthi nje bafuna ukulandela umthetho. "Kakuyona into encane ukumisa imenenja kamasipala, yisinqumo esibucayi kakhulu leso esihlangabezana nomthetho wenkantolo, ngakho-ke bengingeke ngisayine incwadi ngibe ngibona ukuthi kunezinto ezingenziwanga kahle," kusho uMnu Dube.
Uthi kuyilungelo lakhe ukunqaba ukwenza noma yini ayibona ingaphelela enkantolo idle umasipala izizumbulu zemali. Nakuba kunjalo, abanye kumasipala bakholwa wukuthi uMnu Dube ubonakele enengcindezi ngalolu daba njengoba bekufanele alinde izinsuku ezili-14 ngokomthetho uma eseshintshe umqondo ngokumisa uMnu Luthuli.
IDemocratic Alliance (DA) kulo masipala ithi isaxhumene nabameli bayo ukubhekisisa ukuthi yini engenziwa ukuze kungenelele umthetho wenkantolo ngokushesha. UMnu Edwin Baptie oyikhansela leDA eMdoni uthi bafuna ukwazi ukuthi kungani uMnu Luthuli esabonakala emagcekeni kamasipala yize amakhansela enqume ukummisa.
UMnu Tikka Ally oyikhansela leNkatha Freedom Party (IFP), uthe ngeke bakhulume kakhulu ngalolu daba kodwa abakufunayo wubulungiswa neqiniso ngezinsolo ezivelayo ngoMnu Luthuli. UMnu Luthuli akatholakalanga kumakhalekhukhwini wakhe.