UTITINYWE WAFA OHLAHLELE UMNGANI
UYINYATHELE emsileni yagadla owesilisa waKwaMpukunyoni, eMtubatuba, ogwini olusenyakatho yeKwaZulu-Natal ohlasele umngani wakhe wamhlahlela ngocelemba emuva kwalokho watitinywa ngamalunga ophakathi waze waya kwagoqanyawo ngoMsombuluko.
UMnu Sphamandla Mgenge kuthiwa uhlasele uMnu Sabelo Shandu waseNgqopheni khona eMtubatuba kanti akabuzanga elangeni. Leli phephandaba lithole ukuthi umufi ube nengxabano noMnu Shandu ongumngani wakhe, baphetha ngokulwa okuthe uma ebona ukuthi uyehluleka ngenqindi washona kubo eyolanda ucelemba.
UMnu Shandu usizwe wukusho ngengila ngesikhathi ehlaselwa ngumufi kwavele kwaphuma omakhelwane abangabuzanga mkhuhlane, bamkhwelela ngenduku nangemvubu (umufi) waze washaya ngesudi yesele, waquleka. ILANGA lithole ukuthi kukhona nabathile abesebethole into yokudlala ngetotolozi kamufi ngesikhathi eselele phansi kodwa engakashoni. Kuze kube yimanje akekho osazimisele ngokuphumela obala ukuthi ubekhona kutalajwa umufi.
“Inkinga enkulu kakhulu kube wumbango wezintombi nokho-ke engingawazi ukuthi usuke kanjani. Besihleli eduze komgwaqo ngesikhathi behlangana beba nengxoxo emfishane, emuva kwalokho kuqhume iqupha.
Kuqale yena umufi ukugadla, kuthe uma ebona ukuthi uyehluleka wagijimisa okwe-nyamazane elibangise kubo kanti uyolanda ucelemba,’’ kusho ilunga lomphakathi elicele ukuba kugo-dlwe igama lalo.
Okhulumela amaphoyisa KwaZulu-Natal, uCapt Thembeka Mbhele, usiqinisekisile lesi sigameko. Uthe kuvulwe icala lokushona komuntu eliphenywa esiteshini samaphoyisa aKwaMsane, eMtubatuba. Unxuse umphakathi ukuba ubekezele ungazibambeli umthetho.