Linika abantulayo ithuba iKusaselihle
Bachushisa abafundi ngemikhakha ezobazisa
ZIZIMISELE ngokufukula intsha yaKwaZulu-Natal ngokuyithuthukisa kwezemfundo izisebenzi zeSouth African Petroleum Refineries (Pty) Ltd eSiphingo, eningizimu yeTheku eziqome ukusungula inhlangano ezimele, iKusaselihle Non-Profit Organisation.
Le nhlangano esungulwe ngonyaka odlule, ibiyethulwa ngokusemthethweni ngoMgqibelo khona eSapref, eSiphingo lapho bekukhona abafundi abangaphezulu kwekhulu abebephuma ezikoleni ezahlukene.
Ngokusho kukaNkz Londiwe Myeza ongomunye wabasunguli bale nhlangano futhi ongumkhulumeli wayo, inhloso yayo wukusebenzisana nabafundi basezikoleni zamabanga aphezulu eziqhamuka ezindaweni ezintula izinsiza.
“Sonke njengabasunguli bale nhlangano siqhamuka ezindaweni nasezikoleni ebezingenzi kahle, ngakho sibone kungcono ukuba sihlangane kube khona esikwenzayo ukusiza intsha ezikoleni zamabanga aphezulu.
“Kunzima kwabanye abafundi ukuthola usizo lwakwaCentral Applications Office (CAO) ukuze bakwazi ukufaka izicelo ezikhungweni zemfundo ephakeme. Thina njengenhlangano sizongenelela ngokuba sibachushise ngezinto ezahlukene nangemikhakha okumele bayithathe. Sizosiza nalabo abazobe bedinga imali yokufaka izicelo,” kusho uNkz Myeza.
Uthi kubalula kumfundi uma enolwazi olunzulu ngomkhakha awufunayo nangendlela yokufaka izicelo ezikhungweni zemfundo ephakeme.
Kulo nyaka bazimisele ngokuvakashela izikole eziyisi-6 bazisize ngolwazi lokufaka izicelo nokunye, ngokusho kukaNkz Myeza. Uthi kusukela beqalile ukusebenza njengenhlangano ngonyaka owedlule, sebesize abafundi abangaphezulu kwama-600 abaqhamuka ezindaweni ezahlukene okubalwa kuzona iBergville, KwaHlabisa naseNtuzuma.
Omunye wabafundi abathole usizo kule nhlangano, nguBoitumelo Myeza, obefunda eMbopha High School, KwaHlabisa. Lo mfundi uthole usizo lwemali yokufaka isicelo e-University of KwaZuluNatal njengoba ezobe enza izifundo ze-B Com Accounting.
Ubonge kakhulu ngosizo aluthole kule nhlangano njengoba ethi ubebona nje ukuthi ikusasa lakhe liyashabalala kwazise ubengenayo imali yokufaka isicelo kulesi sikhungo.
“Kimina iKusaselihle selifana nomndeni wami. Ngiyabonga kakhulu sengathi bangaqhubeka basize abanye abafundi,” kusho uBoitumelo.
Kimina iKusaselihle selifana nomndeni wami.