Kunomuntu oncamela ukufa kunokuxolisa
SONKE singabantu siyawenza amaphutha futhi nje uma ngingalibeka ngembaba, ngingasho ngithi akekho umuntu ongenalo iphutha empilweni. Yilezi-ke ezibuhlungu, sonke siyawenza amaphutha kodwa akusithina sonke esixolisayo uma sesiwenzile.
Kangazi ukuthi kwenzeka kanjani ukuba uNkulunkulu asidale ngendlela yokuba kithina singabantu kube lula ukwenza iphutha kodwa kube nzima kangaka ukuxolisa. Nami uqobo, ngibhala le ngosi nje cha kunzima impela ukuba uma ngonile bese ngixolisa nje kalula.
Ngeke sakubalekela ukuthi ibhidlikile imizi (imishado), babhidlika ubudlelwano phakathi kwabantu ngoba nje kunzima ukuba oyedwa athi ngiyaxolisa. Ukuba besazile ukuthi uma ungaxolisi usuke uzincisha ubumnandi obu-ngakanani empilweni!
Imnandi impilo uma usulixolisele iphutha olenzile. Ukuxolisa kuyakhokhela, kayishayeki indoda uma isilele phansi ixolisa. Thina bendlu ensundu siyazi ukuthi akashaywa umuntu uma eselele phansi.
Noma bekungathiwa empilweni kawunamali, kawunalutho kodwa qiniseka ukuthi ephaketheni lakho kugcwele ukuxolisa ngoba kuyisihlangu esiyokusebenzela ngelinye ilanga. Uma uxolisa kothandana naye kuba sengathi uthando lwenu luqala ngalolo suku.
Ukuxolisa kufudumeza ubudlelwano obesebuqala ukuba muncu, ukuxolisa kuncibilikisa iqhwa ebeselingenile othandweni. Kubuhlungu ukuhlala nomuntu ongaxolisi futhi nje kuyaxaka ukwazi ukuthi kunomuntu ongancamela ukufa kunokuba athi "ngiyaxolisa".
Uma uxolisa kawulahlekelwa yilutho futhi ukuxolisa kakusilahli isithunzi.
Ubudlelwano obuningi kabubhidlizwanga ngabantu abakubona kodwa babhidlizwa wukuthi uthi umuntu eselenzile iphutha kodwa angakwazi ukuxolisa.
Isihlakaniphi sixolisa noma singonanga ngoba sifuna izinto zibuyele esimeni kodwa isiwula si- yathula, singaxolisi ngisho sesibanjiwe. Ukuxolisa kuwukudla kwezihlakaniphi kodwa ukungaxolisi nempakamo wukudla kweziphukuphuku. Uma ufuna ukubulala isiwula, musa ukusidubula kodwa ubothi masixolise.
Isilima ngokuxolisa nje kodwa hhawu sona sicabanga ukuthi sesiyabulawa. Kuba ngenye indaba-ke bakwethu uma umuntu ezama ukuxolisa bese engaxolelwa. Kubuhlungu ukuxolisa kodwa ungaxolelwa. Isiwula size siqhubeke nokucula iculo ngephutha owalenza ngisho sewaxolisa.
Uzosizwa sithi wazisholo wena ukuthi wenzeni. Kubucayi-ke ukuvuma iphutha ezindlebeni zesiwula. Ngicabanga nje ukuthi uma oyedwa phakathi kwethu engake avume icala lakhe bese ethi ngiya-
* UPastor Sthembiso Zondo ngumeluleki nomethuli wezinkulumo ezakhayo. Uzobe ephendula imibuzo yabafundi ngezinkinga zempilo nezothando kwiLANGA LangeSonto. Abafuna ukuxhumana noma ukummema, inombolo ithi: 073 795 2292. Ungamshiyela nomyalezo kuFacebook: Sthembiso Zondo Fan Page noma kuWhatsApp: 082 070 8034