Iyahambisana nokholo ingcebo?
KWELANAMUHLA sizobheka kafushane indaba yenkolo nokuceba ngokomnotho nganeno kwethuna, ngamanye amazwi kulokhu kuphila. Inkulu impikiswano futhi kakubonakali izophela kuze kubhubhe umhlaba.
Ukulangazela ingcebo yaleli lizwe sekube nomthelela omkhulu, ikakhulukazi ezincekwini ezisingethe umsebenzi weNkosi, kangangoba sekuye kube nokungabaza ukuthi ezinye zazo zibizelwe ngempela yini ebufundisini noma qha.
Ngenxa yokuthi umlobi wale ndaba akakaze aluzwe ubizo lobufundisi kwaze kwadingeka ayeke nomsebenzi aziphilisa ngawo, ukuphawula kuzohamba kudiye ngesikubona ngeso lenyama ngoba singenalwazi ngephimbo likaNkulunkulu ukuthi inceku liyibiza kanjani, futhi kuluphi uhlobo lobizo.
Nakuba lena kuyindaba ebhekiswe kubo bonke abantu abangabazalwane, nokho ngenxa yendawo yamandla abakuyona abefundisi, kungenzeka kuzwakale sengathi lena yindaba ebhekiswe kubona bodwa kanti qha.
Imbangela wukuthi bona njengabaholi basendaweni ebabeke obala futhi ehambisana nomthwalo wokwamukela iminikelo yabaza-lwane emabandleni abawaholayo. Kambe kuyimpazamo yini kumbe kuphambene yini neZwi leNkosi ukuba umuntu oyikholwa acebe, ikakhulukazi ongumholi?
Ivesi elivame ukuhlanekezelwa maqondana nokuba nemali, ngelisencwadini I KuThimothewu 6:10 lapho kuthi khona:
“Ngokuba ukuthanda imali kuyimpande yakho konke okubi, abanye ngokuyifisa badukelwa wukukholwa, bazigwaza ngeminjunju eminingi.”
Lona-ke balihlanekezela bathi imali yimpande yakho konke okubi. Ngoba sesihlambululene kuleli phuzu, sesingase sidlulele phambili sibheke ukuthi kwezinye izahluko lithini iZwi leNkosi maqondana nemali.
Mangikwendlalele lokhu ngokucacisa nje iphuzu libe linye elithi kungase kwenzeke ukuba izikhalo ngokuceba kwezinceku zisukela endleleni ezibonakala ziceba ngayo, hhayi ngoba kukubi ukuba nengcebo.
Masiqhathanise leli vesi eselishiwo namanye amavesi esingacabanga ukuthi azowukhulula unembeza kumzalwane ocebile kumbe oqokelela ingcebo ngezinhlo- so ezinhle. UMshumayeli 10:19, thi:
“Idili lenzelwa ukuhleka newayini liyenamisa ukuphila, kepha imali iyimpendulo yakho konke.” Umbuzo ongase uziqhamukele nje nasencekwini okungenazikhalo ngayo ngothi uma idele konke yamukela ubizo, kambe yona kumele imali yokuziphilisa nomndeni wayo iyithole kuphi, kanjani?
Uba kuphi umkhawulo ekuthini uma iziphilisa ngomnikelo kumele isebenzise ongakanani igcine kuphi? Le mibuzo inesifundo sokuthi indaba yokwenziwayo ngomnikelo okhishwa ngabazalwane enko- nzweni iphakathi kwenceku noNkulunkulu. Amanye amabandla asebenzisa isigungu sebandla kanti amanye - ikakhulukazi azimele konke kunqunywa kwenziwe ngumfundisi.
Kuningi kakhulu okungase kuqubuke kulokhu osekushiwo, nokho inhloso lapha bekuwukubheka nje ukuthi iZwi leNkosi limi kuphi ngokuceba kokholwayo. Incwadi iZaga 10:22 inamazwi athi: “Isibusiso sikaJehova siyacebisa, akenezeli usizi kuso.”
Kuzo futhi iZaga 13:22 kuthi: “Olungileyo oshiyela abantwana bakhe ifa, kepha ingcebo yesoni ibekelwa olungileyo.” Kuwona womabili amavesi acashunwe kamuva, kuvela ukuthi ukuceba akumelene nokukholwa. EThestamenteni Elisha kunevesi elisencwadini II KwabaseKorinte 8:9 elithi:
“Ngokuba niyawazi umusa wenkosi yethu uJesu Kristu ukuthi nakuba icebile, yaba mpofu ngenxa yenu, ukuze ngobumpofu bayo nicebe nina.”
Seyiyonke nje le ndaba ilele ekuthini lowo ocebayo uzicebise kanjani nokuthi uyisebenzisa kanjani-ke leyo ngcebo asuke esebusisiwe ngayo. Leli yiphuzu elimqoka ngoba ukubukisa ngengcebo bese kungasizakali muntu ngalokho, ikakhulukazi abampofu - kwenza kube nemibuzo ngokusetshenziswa komnikelo emabandleni.
Nakuba sekuyinto eyaziwayo ukuthi emazweni asethuthukile kwezomnotho njengase-United States of America (USA), akusethusi ukuzwa kuthiwa umfundisi webandla elithile usehamba ngendiza.
Kulungile-ke lokhu uma ikhona incazelo yakho ngoba baye bathi uPhapha wamaKhatholika yena awubhekiswa ngani kuyena lowo mbuzo. Uma-ke umfundisi esewathenga aze abe mane noma ngaphezulu, kusuke sekungawani?