SENGATHI INGAHHAHHANYEZWA KUYO YONKE IMICIMBI I-ANC
MHLELI: Itshe limi ngothi Nkombose kababa kwi-African National Congress (ANC). Sekuyisikhathi ngempela sokuba abaholi bazinuke amakhwapha uma sibheka okwenzeke ngoSuku Lwezisebenzi, okuyihlazo elikhulu.
Umhlonishwa uThabo Mbeki lapho ekhona uyasho ukuthi mudle muthi wakhe yize naye zamnetha kodwa kwakungcono okwakhe. Okwenzeke kuMengameli Jacob Zuma eFree State, kuNkz Baleka Mbete benoMnu Sihle Zikalala eThekwini noNkk Jessie Duarte eLimpopo, kusazoqhubeka nakwabanye kwenzeke. Ingani kwenzekile kuMnu Pravin Gordhan nakuDkt Zweli Mkhize kodwa i-ANC kayizange ikhuze.
UMnu Zizi Kodwa akazange asigxeke leso senzo, pho kungani uma sekwenziwa kuZuma kube nomsindo ongaka? Ngaphambi kokuba i-ANC Youth League (ANCYL) ihhewule uMkhize noGordhan, iqalile yabonana noMengameli Zuma ehhotela thizeni engingeke ngilisho kodwa unobhala wayo, uMnu Thanduxolo Sabela uyakwazi lokho. NaseFree State oMnu Ace Magashule bathathe abantu abangezona izisebenzi, abayi-ANC phaqa bagqokiswa izikibha ezibhalwe 100% Zuma, ngeshwa behlulwa wukubhula ulaka nomlilo wezisebenzi ngoZuma. Okwenzekile sengathi kungenzeka kuyona yonke imicimbi ukuze abaholi beyogcina bekubona kufanele ukuba behle manje ezikhundleni, sekwanele. Kuhle ngoba vele iCongress of South African Trade Unions (Cosatu) ingamalunga e-ANC okwenza uzibuze ukuthi kungani bememele abantu uZuma sebeshilo ukuthi kabamfuni ngoba akakulungele ukuhola izwe. Ongakaboni ukuthi iqalile impi manje ngeke aphinde abone.
Lolu hlaka olufuna uNkosazana Dlamini-Zuma abe ngumengameli ngeke luphumelele. Lucabanga ukuthi ayinsangu amalunga e-ANC okanye badidwa yila masaka emali namathenda abathengwa ngawo ukuba baphakamise uDlaminiZuma. Kwenziwa yini kuphakanyiswe uDlamini-Zuma ebe amagatsha engakamphakamisi. Ukuba kuya ngami ngabe i-ANCYL iyahlakazwa ngoba kayinamsebenzi walutho, ifana nenja engenamazinyo. UBonginkosi Khanyile noDlamini basukuma kwiFees Must Fall kodwa i-ANCYL igcwele amabhanisi emlonyeni, akukhulumeki. Uyeza unyaka wezi-2019 siyohlangana evotini.
Zakhele Msibi ETHEKWINI