YISIKHATHI ESIBALULEKILE SOKUVIKELA
NJENGOBA kuthwasa ubusika nje, umlimi angaze acabange ukuthi yisikhathi sokuphumula kungakafiki izimvula zentwasahlobo kanti cha, yisona sikhathi esimatasa ukudlula zonke lesi ngoba phela kumele kuthi kufika ihlobo konke kube sekumi ngomumo.
Uma ngabe umlimi enemfuyo, kubalulekile ukuba nohlelo lokuyidedela ensimini ngoba kwasayona ingenza umonakalo othile njengokuthi nje, umhlabathi ungagqinqeka noma ubemagedugedu kuze kube nemigede ezobanga ukuguguleka komhlabathi namanzi. Lokhu kubaluleke kangangoba ngisho ukuqhutshwa kwayo imfuyo isuka engxenye iya ngale kumele kuhleleke. Ngesikhathi isimo sezulu sibonisa ukuthi singase sihlukumeze imfuyo, kumele lube khona uhlelo olubonisa ukulungiselelwa kokuvikelwa kwemfuyo ngaleso sikhathi, kungabi nje wukuthi kwenzeka isinoma kanjani.
Lolu hlelo kumele luze lubalule ngisho nokuthi umlimi uzokwenzenjani ukulungiselela ukugeleza kwamanzi ngalesi sikhathi. Kumele kube nezimila ezihleleke ngendlela yokuthi nxa amanzi efika kule ndawo, wonke umsoco okuyona ubambeke ungadluli nawo ngesikhathi egeleza.
Ngale ndlela umlimi ubhekele imfuyo futhi uyakhumbula ukubhekela izitshalo zesikhathi esilandela lesi. Ezinye izimo ezidinga ukubhekelwa kokuvikela ukuguguleka komhlabathi, ukungalimi ezindaweni ezisengcupheni yokuguguleka, ukunciphisa ukucekela phansi amahlathi namahlokozi ngenxa yesidingo sezinkuni.
Lesi simo singavikeleka ensimini ngokuba utshale ingubo eluhlaza yokwembathisa umhlabathi ngesikhathi usalalisile. Izitshalo ezifanele lo msebenzi ngezikhula masinyane zimboze umhlabathi ngokushesha, ezikhula noma komisile, ezinezimpande ezigxilayo, ezisikwayo ukuze kondliwe