Zithuthukise emsebenzini, ungabi yisehluleki
BANINGI abantu abenza imisebenzi abangazange bayifundele futhi abangakaze bazicabange ukuthi bayoke bayenze. Okwenza abantu bazithole benza imisebenzi abangayifundelanga wukuntuleka kwemisebenzi bese begcina bethatha noma yini eqhamuka kuqala. Kubuhlungu ukuthi siyaqhubeka nokwenyuka isibalo sezifundiswa eziduve emakhaya neziqu zazo.
Ukuntuleka kwemisebenzi kugcina kubenze bathathe noma yini eqhamukayo inqobo nje uma bezohola ekupheleni kwenyanga nakuba lowo msebenzi ungahambisani nabo. Uma sebeqalile ukwenza le misebenzi kuningi abahlangabezana nakho abebengakulindele nokwenza bagcine bengasakuthokozeli ukusebenza, sebegcina icala kucacele noma ngubani ukuthi kabawuthandi umsebenzi abawenzayo.
Sekukaningi kuzwakala izikhalo ngezinye zezisebenzi zikahulumeni, ikakhulukazi abahlengikazi nothisha, ukuthi bayehluleka wukwenza imisebenzi yabo. Kubalulekile ukuthi uma abantu bezithola benza imisebenzi abangayifundelanga bazimisele futhi baqhubeke nokuzikhulisa ngolwazi lwalowo msebenzi ngokwenza ama- short course, bazithuthukise.
Nalabo abawufundele umsebenzi kuhle ukuba nabo bazikhulise ngoba izinto ziyashintsha ikakhulukazi njengoba sekunyuka nezinga lobuchwepheshe. Ezinye izinkampani ziyazibophezela ngokuthuthukisa izisebenzi zazo ngezindlela ezahlukene. Ziyakwazi ukukufundisa zikuhambise lapho uzothuthukisa khona ulwazi lwakho ukuze nayo ithuthuke.
Kuhle ukuba ngaso sonke isikhathi uhlale unobudlelwano obuhle nezikhulu zenkampani ukuze uma kwenzeka evuleka amathuba okuthuthuka kube nguwena obhekelelwa kuqala enkampanini.
Khumbula, nakuba ungaba nobudlelwano nabaphathi kodwa qhubeka nokuzimisela, uzikhandle kakhulu ngoba nakho lokho kungakubeka emathubeni amahle okukhula.
Uma ubona ukuthi konke inkampani ekuzamayo kokukuthuthukisa akuhambisani nawe, kuhle usheshe ubike ingaze imoshe imali ngawe ekubeni wena ungazimisele ngokukhula kuyona.
Kwesinye isikhathi kuhle ubazise abaphathi bakho ngezinhloso zakho ukuze nabo babe nolwazi ukuthi bangenzani ukukukhulisa.
Kungenzeka ukuba uqashwe njengomabhalane enkampanini kodwa wena awuzimisele ngokukhula ungumabhalane kodwa ufuna ukukhula komunye umkhakha khona ngaphakathi enkampanini. Gwema ukuba yisahluleki.