KUMQGUGQUZELE UKUNGAWINI KUMA-METRO FM AWARDS
UFUNA ukuzithoba amanxeba ngezindondo zamaSouth African Music Awards (SAMA) uBabes Wodumo, ophoxekile ngemuva ngokukhala ngaphansi emncintiswaneni wamaMetro FM Music Awards (MMA), kwadumala abaningi.
Uthi akakapheli umoya ngemincintiswano yezindondo nakuba ephoxekile kumaMMA lapho ebelindele khona ukuhlabana ngendondo yokuqala. Uthe ukungatholi lutho kuma-MMA kumfakele umfutho wokusebenza kanzima.
“Ngizimisele ngokubuya nezindondo emncintiswaneni wamaSouth African Music Awards (SAMA), kumnyama kubomvu,” kusho uBabes Wodumo.
Uqokwe eminxeni emihlanu, okuyi-New Comer of the Year, Best Kwaito Album, Female Artist of the Year, Remix of the Year, kanye nakwiRecord of the Year.
Uthi ngeke aphele umoya ngoba izindondo zisho lukhulu kuyena njengomculi osemncane. Umfutho uthi uwuthole kubalandeli bakhe abebelokhu bemtshela ezinkundleni zokuxhumana ukuthi akangenele khona bezomvotela.
Uhlela ukuphuma imikhankaso yokunxenxa amavoti ezindaweni ezahlukene. Utshele leli phephandaba ukuthi ukungatholi ngisho indondo yokubika nje kumaMMA kwamphula umoya kodwa wakhetha ukuthula, angakhulumi izinto ezikhulunyiswa wukudinwa.
Ukungawini lutho kukaBabes kwashiya abantu abaningi bebambe ongezansi, kwazise le ntokazi ayiconsi phansi kubalandeli bayo. Ingoma kaBabes esihloko sithi “Wololo” yafika kwezwakala. Kuma-SAMA uthi uyojabula kakhulu uma ethole noma yi- award eyodwa nje.
“Angisho ukuthi ngifuna ukuqoqa konke ngoba baningi abanye abaculi abasebenze kanzima engiqhathwe nabo,” kusho yena.
Uthe abaculi aqhathwe nabo ubahlonipha kakhulu futhi ngeke ababukele pha-nsi, yingakho nje ezosebenza kanzima enxenxa amavoti.
Utshele leli phephandaba ukuthi kakubanga mnandi kumaMMA ngesikhathi kumenyezelwa iSong of the Year ngoba wayemile ngemuva esteji elindele ukuthi kuzobizwa igama lakhe.
“Kwaba buhlungu kakhulu ngimile ngemuva, kwamenyezelwa owinile, maqede kwadlala iWololo kwamele ngingene esteji ngijabulise abantu, ngihlukumezekile nginjalo,” kulanda yena.
Uthe kumaSAMA akazimisele neze ngokuphoxeka. makhoba@ilanganews. co.za