AZOBABHINCISELA NXANYE AMABHINCA KWI-VDJ

KUHLANGANE abaMantshontsho kaMaskandi neMpucuzeko Skills and Development ngenhloso yokuqhakambisa ukuzigqaja kwamabhinca eNingizimu Afrika.

Laba bahlangane bazibiza ngokuthi yiHlahla Lamabhinca kanti bazoba nezinhlelo ezahlukene abazoba nazo zokuqhakambisa ububhinca. Ngokusho kukaZazi Nxele ongumxhumanisi weHlahla Lamabhinca, kubalulekile ukuba sibuyise ukuzigqaja kwabantu ngalokhu abayikho.

“Njengoba sekubekwe kwacaca ukuthi lona ngunyaka wamabhinca kuhle ukuba abantu sibabekele isithombe sokuthi kuyini ukuba yibhinca.

“Abantu abaningi banolwazi olungaqinisekisiwe ngokuba yibhinca ngakho kuhle ukuba sibafundise, sibakhuthaze ukuba bazigqaje ngaphandle kokuzizwa bebukeleka phansi,” kuchaza uNxele. Uthi ngaphansi kwezinhlelo abanazo wukuthi babe netende lamabhinca kwiVodacom Durban July.

“Kuleli tende sizokhuthaza abantu ukuba bavunule banconse ngengqephu yesintu. Sifuna futhi nokukhombisa abantu ukuthi akumele uze ushintshe ubuwena ukuze uhambele imicimbi emikhulu ungaba yibhinca elisezintweni ukhululeke kunoma imuphi umcimbi,” esho.

“Sisaxhumana nezinhlaka ezahlukene ukuze zibe yingxenye yaleli tende. Sikhuthaza osomabhizinisi asebephumelele futhi abazigqajayo ukuba babenathi,” eqhuba.

UNxele uthi bazohlela futhi uhambo lapho bezoya kobuka umdlalo webhola likanobhutshuzwayo lezimbangi zaseSoweto.

“Ukuba yibhinca akusho ukuba wumZulu kuphela kodwa ungaba umXhosa oyibhinca noma umSuthu noma yibuphi ubuzwe, inqobo nje uma uzigqaja ngobuwena,” kusho uNxele.

Kuzokhumbuleka ukuthi ngemuva kokuba uMroza ehlukanise unyaka ngengoma yakhe esihloko sithi “Elamanqamu” iningi labantu lizwakalise ukuthi lona ngunyaka wamabhinca.