"KOZE KUSE" EMAMAS
UZOTHOKOZISA abalandeli ngeSonto uMondli Ngcobo osanda kukhipha i- single ethi ‘Inkanyezi’. Lo mculi ozakhele igama ngokusebenzisana nabaculi abafana noDJ Merlon, uBongi Dube, iBig Nuz, uDJ Tira nabanye uzobe eqhulula izingoma ezizobe zikwi- album yakhe azoyikhipha.
UMondli ojwayele ukuhlanyisa abantu ngokudlalisa iphimbo lakhe uma ecula uzobe eseMama’s Jus’ Jazzing, eDurban North, eThekwini. Le ndawo isizakhele igama kwabaningi ngokuletha abaculi abanohlonze okubalwa kubo uSi-mphiwe Dana, uHotstix Mabuse, noSands nabanye.
Ngaphandle kukaMondli kuzobe kunandisa noDJ Muntu obuye aziwe ngelika-Master Blaster, Collen Zondo weGagasi FM, noNu Savoys abahlezi bedlala kule ndawo ngezimpelasonto kwi-Mama’s Sunday Soul & Jazz Sessions.
Izethameli zizobuye zithokozele nokubona uKhaya Dladla olingisa indawo kaGC emdlalweni uZalo odlala kuSABC 1, ozobe ephethe uhlelo. Kungenwa ngo-R50 emnyango, kanti kuzovulwa ngehora lokuqala emini.