Akalona ivukana ezinkulumeni ezakhayo uMkokstad
UNGENE shi ekwethuleni izinkulumo ezakhayo umfowabo omdala kaDumi Mkokstad. UThulani Mkokstad Nzimande osejwayele ukubonakala lapho kucula khona uDumi utshele ILANGA LeTheku ukuthi akalona ivukana kule ndima.
“Ngiyazi ukuthi abantu abaningi bayazibuza ukuthi bengikuphi. Ngikhule ngivele nginomuzwa wokwenza izinkulumo ezakhayo nezikhuthazayo. Ngisho naye uDumi lo osedume izwe lonke ubegquqguzelwa yimi. Namanje ngisamgqugquzela njalo uma ezocula phambi kwabantu,” kuchaza uThulani Mkokstad.
Ebuzwa ukuthi pho yini azibize ngegama elithi Mkoktsad eselivele liyi- brand kaDumi Mkokstad uphe- ndule kanje:
“Ngiyazi ukuthi emehlweni abaningi kuzobonakala sengathi ngidla amandla kamfowethu kodwa kakunjalo. Empeleni saba nesivumelwano sokuthi ngilisebenzise leli gama. Isizathu salokhu wukuthi sinebhizinisi lezimpahla esilenza naye uDumi. Phezu kwalokho udumo aluthelelani, ngisho ungazibiza ngomuntu owaziwa umhlaba wonke.” Uthe yena noDumi bangabantu abehlukene nabenza izinto ezingafani:
“UDumi uyacula mina ngigxile ezinkulumeni ezakhayo. Cishe ingaphezu kwesishiyagalombili imisakazo yomphakathi engisebenza nayo. Ngingena isonto lonke, kusukela ngesonto kuze kuyoshaya uMgqibelo,” kucacisa uThulani Mkokstad.
Uthe uyazi ukuthi sebebaningi abenza lo msebenzi kodwa lokhu ngeke kumthene amandla.
“Ngingene kulo mkhakha zivele zikhona izinkakha zakhona, kodwa ngingakuqinisekisa ukuthi okwami kwehlukile. Angizile ukuzoshumayela kodwa ngizokhuluma nentsha yakithi, intsha engangami - ngizobuyisa ithemba kubantu. Ngiyazi ukuthi ngibizelwe kulo mkhakha,” kulanda uThulani Mkokstad.
UDumi Mkokstad ukuqinisekisile ukuthi umfowabo nguyena omgqugquzelayo.
“UThulani Mkokstad ngubhuti wami omdala, ngibukela kakhulu kuyena. Abantu abaningi abazi ukuthi kwesinye isikhathi kubakhona ingcindezi enkulu kule ndima. Mina nginenhlanhla ngoba usuke ekhona umuntu ozongigqugquzela, angikhuthaze, angikhumbuze ukuthi ngingubani,” kusho uDumi.