I-NFP kayisona i- spaza - NFPWM
EZEPOLITIKI: Basola ukuthi kukhona abasebenzisa uVZ
“INATIONAL Freedom Party kakusona i- spaza kodwa yiqembu labantu.”
Lawa ngamazwi ashiwo nguNkk Sindi Mashinini ongumengameli weNational Freedom Party Women Movement (NFPWM) ngesikhathi ekhuluma esigcawini sabezindaba kwelinye lamahhotela izolo ngoLwesithathu eThekwini.
Ubekusho lokhu emuva kuhlakazwa kwesigungu esiphezulu seNFP okugcine kuholele ekutheni kuyiswane enkantolo.
Kuzokhumbuleka ukuthi umengameli waleli qembu, uNkk Zanele Magwaza-Msibi, unqume ukuhlakaza izinhlaka zaleli qembu - kwabekwa ezesikhashana - emuva kwezinkinga ebezikhona ezigcine zenze ukuba lingabi yingxenye yokhetho lohulumeni basekhaya obelungonyaka ophelile.
Kulesi sigcawu sabezindaba, uNkk Mashinini ukhwele wadilika kulabo abasola ngokusebenzisa uNkk Magwaza-Msibi ngoba befuna ukufeza izinhloso zabo. Uthi inhloso yokuya kwabo enkantolo kakukhona ukudelela uNkk Magwaza-Msibi kodwa bafuna aphumele obala ukuthi nguyena yini onqume ukuhlakaza izinhlaka zeqembu.
Bekukhona namalunga eNFP obekubonakala ukuthi anengekile yisinqumo sikaNkk MagwazaMsibi.
UNkk Mashinini uthe kababoni kusemthethweni ukuhlakazwa kwesigungu esiphezulu ngoba bona bazi ukuthi umengameli uyagula futhi ubengakabuyeli emsebenzini.
“Phambilini kulethwe ikomiti obekuthiwa lizobhekana nezinkinga emuva kokungangeni kwenhlangano okhethweni. Yize bengingahambisani nalokhu, ngehlela ngezansi ngasebenzisana nalo leli komiti, kodwa sigcine sehlulekile enkantolo ukungena okhethweni.
"Sibe sesithola ubhalonyazi luqhamuka kuMnu Canaan Mdletshe (okhulumela uNkk Magwaza-Msibi esikhundleni sakhe sokuba yisekela likangqongqoshe wezesayensi nobuchwepheshe) esitshela ukuthi siyadingeka kwelinye lamahhotela, sibizwa ngumengameli. Ngiyile kulowo mhlangano kodwa ngafika usuqalile. Kungaleso sikhathi-ke kufundwe khona lo mqulu onamakhasi ayisi-7 obuchaza ngokuhlakazwa kwezinhlaka zeqembu.
"Okungixake kakhulu wukuthi uhlu lwabantu abamenyezelwe ukuthi yibona abaqokwayo (ukubamba okwesikhashana), kasibazi bonke, ngisho nasezifundeni zabo kabaziwa. Kuyasixaka ukuthi umengameli ubengakwenza kanjani lokhu ekubeni engazange eze kithina akhulume nathi njengesigungu esiphezulu.
"Kakulungile ukuba umengameli ezwe izinto ngabantu eceleni bese eyazikholwa athathe izinqumo ezinjengalezi engezanga kithina. Kufanele sikucacise ukuthi kunabantu abangemuva abasebenzisa umengameli wethu esimthandayo ukufeza izinhloso zabo.
"Iqembu ngelabantu, ngakho kasikwazi ukuliphendula i-spaza lapho kungavele kuthathwe izinqumo kungalandelwanga umthethosisekelo weqembu.” kusho yena.
Ukhwele wadilika kuMnu Mdletshe ethi akalona ilunga leNFP ngakho makahlukane nokuzihlanganisa nezinto ezithinta leli qembu.
UMnu Mdletshe uthe akwenzayo usuke ethunywe nguNkk MagwazaMsibi.
“Uma befuna ukubhalela ihhovisi, bangakwenza lokho kodwa okumele bakwazi wukuthi mina ngisuke ngenza engikuyalelwe nguNkk Magwaza-Msibi,” kusho yena.