Igwema ukuzethemba ngokweqile iLiverpool
IBHOLA: lngase iphucwe iqatha lokudlala kwi-Uefa Champions League
UGWEMA ukuvuvukalelwa yikhanda uSimon Mignolet ongunozinti weLiverpool ezibeke ethubeni lokungena kwi-Uefa Champions League iguqisa iWatford ngo-1-0 ngoMsombuluko kowe-English Premiership.
Lo mphumela wenze yashiya iManchester City esendaweni yesine ngamaphuzu amathathu yase ishiya iManchester United ekweyesihlanu ngamaphuzu amane.
I-City neRed Devils basele ngomdlalo owodwa ikilabhu ngayinye. La makilabhu asembangweni wokuqeda ebalwa namane aphezulu ukuze ezokwazi ukungena kwiChampions League ngesizini ezayo.
UMignolet uthi bazokube bazigwaza ngowabo uma bezitshela ukuthi sebeqedile ngalezi zimbangi zabo. Uthi imidlalo emithathu esele kwiligi ingashintsha izinto eziningi uma bezovuvukalelwa ngamakhanda.
ILiverpool izokwamukela iSouthampton ngeSonto ngo-14h30.
ILiverpool isahlulwe emidlalweni eyisithupha kwiPremiership. Kuleyo midlalo, iguqiswe kweyisi- hlanu ngamakilabhu angekho kwayisithupha aphezulu. Lokhu kuyibeka engcupheni njengoba kucaca ukuthi irekhodi layo kalilihle kumakilabhu angekho phezulu.
ISouthampton isendaweni yesi9. Ngemuva kwalo mdlalo iLiverpool izodudulana neWest Ham United esendaweni ye-15 bese isonga isizini ngokubhekana neMiddlesbrough esempini yokuvika izembe.
“Sinenkinga uma sibhekene namakilabhu angekho phezulu. Nginovalo lokuthi sizophoxeka uma sizitshela ukuthi sesingenile kwiChampions League. Okuhle wukuthi sonke siyafisa ukudlala kulo mqhudelwano. Kumele sibhukule sisebenze ngokubambisana ukuze sifeze leli phupho,” kusho lo nozinti.
Isiyonke imidlalo ye-English Premiership kule mpelasonto ihlelwe kanje: KUSASA NGOLWESIHLANU West Ham United vs Tottenham Hotspur 21h00 (SS3).
NGOMGQIBELO
Manchester City vs Crystal Palace 13h30 (SS3). Burnley vs West Bromwich Albion 16h00. Bournemouth vs Stoke City 16h00 (SS7). Hull City vs Sunderland 16h00 (SS3). Leicester City vs Watford 16h00 (SS5). Swansea City vs Everton 18h30 (SS3). NGESONTO
Liverpool vs Southampton 14h30 (SS3). Arsenal vs Manchester United 17h00 (SS3). NGOMSOMBULUKO
Chelsea vs Middlesbrough 21h00 (SS3).
* EyeSpanish La Liga ihlelwe kanje:KUSASA NGOLWESIHLANU Sevilla vs Real Sociedad 21h00 (SS12). NGOMGQIBELO
Sporting Gijon vs Las Palmas 13h00 (SS12). Atletico Madrid vs Eibar 16h15 (SS12). Barcelona vs Villarreal 18h30 (SS7 nakwiSS12). Granada vs Real Madrid 20h45 (SS7 nakwiSS12). NGESONTO
Deportivo Alaves vs Athletic Club 12h00 (SS12). Valencia vs Osasuna 16h15 (SS12). Deportivo La Coruna vs Espanyol 18h30 (SS12). Malaga vs Celta de Vigo 20h45 (SS4 nakwiSS12). NGOMSOMBULUKO
Leganes vs Real Betis 20h45 (SS12).