Isajamelene ngombango weSafa eThekwini

Kungase kuphindeke esangeminyaka edlule

USAQHUBEKA nokugadla kumakilabhu umbango wamandla okuhola iSouth African Football Association (Safa) eThekwini Region njengoba emakhulu amathuba okuthi lesi sifunda siphinde sithumele amakilabhu amabili emidlalweni yokukhipha umakhonya waKwaZulu-Natal.

Ngeledlule bekudlalwa imidlalo yokukhipha ikilabhu ezomela iTheku ngaphansi kobuholi baseCurries Fountain obuholwa nguMazwi Mkhize. Kule midlalo kube nomunyu kuhlaselwa unondweba wesifazane emuva kokunqoba kweMageba Warriors yaseFolweni ihlula iKwaDabeka Sporting yaseClermont ngo-1-0 ngoMgqibelo eKing Zwelithini Stadium, eMlazi.

ILANGA lithole ukuthi imidlalo yokukhipha ikilabhu ezomela iTheku ngaphansi kobuholi bukaAlpha Mchunu obuzinze eHoy Park, izoqala mhla zili-19 isongwe zingama-21 kwephezulu eTills Crescent, eSydenham. Lokhu kwenza kungacaci ukuthi yilona luphi uhlangothi oluzogcina lukhiphe ikilabhu ezodlala.

Sekuwunyaka wesithathu kulandelana amakilabhu ekulesi simo ngenxa yombango wabantu abadala abangangeni enkundleni.

Ngonyaka owandulela odlule kugcine kudlale iThongathi ebikhishwe ngubuholi bukaMchunu. Le kilabhu ikhushulelwe esigabeni seSafa KwaZulu-Natal ABC Motsepe League. Kulo nyaka yiyona edle ubhedu kulesi sigaba okuyinika igunya lokumela isifundazwe emidlalweni yokuhlungela ukungena kwiNational First Division (NFD).

Ngonyaka odlule iTheku limelwe yi-Ashley ebikhishwe wuhlangothi lukaMkhize. Nayo inyukele kwiMotsepe League.

UKwenzakwakhe Ngwenya wemiqhudelwano yeSafa esifundazweni, uthi kayikabathinti indaba yaseThekwini. Uthe bona bazongenelela uma kwenzeka iTheku liletha amakilabhu amabili. Imidlalo yesifundazwe izoqala mhla zingama-26 isongwe zingama-28 kwephezulu esifundeni iLembe esiholwa nguHlelizwe Mhlongo.

Imidlalo kazwelonke izokuba phakathi kukaNhlangulana (June) noNtulikazi (July) eBeaufort West, eWestern Cape. Kazikakhishwa izinsuku.