UZOQASHWA NGOKUGCWELE U-FADLU DAVIDS
UZOWUNIKWA ngokugcwele umsebenzi wokuqeqesha iMaritzburg United uFadlu Davids owenza izimanga njengoba eyibamba lo mlolongi kule kilabhu eholwa nguFarook “Ntshebe” Kadodia.
UDavids unikwe umsebenzi wokubamba lesi sikhundla okwesikhashana emuva kokuba uRoger de Sa eshiye isigubhukane ezinyangeni ezimbalwa ezedlule.
Ubengaqali ukubanjiswa lesi sikhundla kwazise nangesikhathi kushiya u-Ernst Middendorp usinikiwe okwesikhashana.
Ngaso sonke isikhathi uma ebambile ugila izimanga kule kilabhu njengoba eshaya kwasani.
ILANGA selingakuqinisekisa ukuthi uKadodia usegculisekile ngoDavids kangangoba umatasa ulungisa inkontileka azomsayinisa yona ukuba ngumqeqeshi wale kilabhu ngokugcwele.
Leli phephandaba lishayela uKadodia ngalolu daba, uvumile ukuthi usegculisekile ngoDavids.
“Nakuba ngingeke ngande ngamaningi kodwa ngikholwa wukuthi usetshengisile ukuthi usekulungele ukuthatha lo msebenzi ngokugcwele. Nokho izindaba ezithinta izinkontileka sizozibheka uma sekuphele isizini,” kusho uKadodia.