KUSALELE OSUTHWINI NGOKUBUYELA KWI-ABSA PREMIERSHIP

KONKE kusalele ezandleni zabadlali bamaZulu FC ukubuyela kwiAbsa Premiership ngesizini ezayo.

Usho kanjena uQedi Dlamini oyiMenenja yoSuthu ephawula ngamathuba ale kilabhu okungena emidlalweni yokuhlungela ukunyukela esigabeni esikhulu ngokuphela kwale sizini.

UDlamini uthi ifana neyamanqamu imidlalo emithathu esalele uSuthu. USuthu luzodlala neSantos ebambe ibhuleki ngeSonto ngo-15h00 ePrincess Magogo Stadium, KwaMashu, bese ngoLwesithathu ngo-15h00 lududulane neJomo Cosmos eKing Zwelithini Stadium, eMlazi.

Kungenwa mahhala kuyona yomibili le midlalo. Luzovala isizini ngokugijimisana neFC Cape Town emdlalweni ozokuba seCape Town.

“Imiphumela yakamuva isiphoqa ukuba siyinqobe yomithathu imidlalo esisalele. Sinelikhulu ithemba lokuthi lokho sizokwazi ukukwenza.

“Okusiqinisa idolo lokungena kweyokuhlunga wukuthi amakilabhu esibanga nawo asazobhekana nemidlalo enzima kakhulu,” kusho uDlamini ezakhe ezidliwe yiMilano United ngo-1-0 ngoLwesibili ekubeni bezibuya esibhaxwini seBlack Leopards sika-3-2 ngoMgqibelo ekuhambeni.

UDlamini unxusa abalandeli ukufika ngobuningi ukuzofaka abadlali ugqozi.

Uthi okuhle wukuthi akekho umdlali osesigwebeni kumbe olimele njengoba kusanda kubuya u-Energy Murambadoro ongunozinti.

Isiyonke imidlalo yeNFD ehlelelwe ukugijinywa ngempelasonto imi kanjena:NGOMGQIBELO EThohoyandou Stadium: Black Leopards vs Magesi FC 15h00.

Witbank Spurs vs Mbombela United 15h00. FC Cape Town vs Mthatha Bucks 15h00.

Stellenbosch vs Real Kings 15h00.

University of Pretoria vs Milano United 15h00. Jomo Cosmos vs Royal Eagles 15h00.

AmaZulu vs Santos 15h00.

ISITHOMBE NGABE: BACKPAGEPIX UBUNGAFUNGA ukuthi kuhlukaniswa unyaka eMhlathuze Sport Complex ngesikhathi iThanda Royal Zulu ijabulela ukunyukela kwi-Absa Premiership emuva kokuhlula iStellenbosch FC ngo-2-1 koweNFD izolo ngoLwesithathu ntambama kule nkundla.