INJABULO ITHANDA IBUYELA KWI-ABSA PREMIERSHIP

KUQHUME imikikizo, kwaduma ingoma, kwaphuzwa amawayini, uRoger Sikhakhane ongumqeqeshi wandiza emoyeni iThanda Royal Zulu ibuyela kwi-Absa Premiership emuva kokuba iguqise iStellenbosch FC ngo-2-1 koweNational First Division (NFD) izolo ngoLwesithathu ntambama eMhlathuze Sport Complex, eRichards Bay.

Amagoli abuyisele iThanda kwiPremiership abhakuziswe enethini nguKhotso Malope ngomzuzu wama-33 noMichael Gumede ngowama -68. Elokubika ekhaya leStellenbosch kube yiphenathi kaMame Niang ayibhajiswe ezintanjeni ngomzuzu wama-55.

USifiso “Jomo” Biyela, obesemanzi te yiwayini, uthembise abalandeli bale kilabhu isiphihli somcimbi ukubabonga ngokubeseka ngokufika ngobuningi emidlalweni yale kilabhu.

“Sizokwenza indumezulu yomcimbi uma sesiphethe indebe ukubonga abalandeli abebewa bevuka nathi kunzima,” kusho uBiyela eqhulula ingoma.

ULunga Sokhela oyiMenenjajikelele yamaZulu FC obehambele lo mdlalo, ubongele iThanda ngempumelelo yayo.

“Ukuphumelela kweThanda kusijabusile kakhulu futhi kwasifaka umfutho ukuthi nathi silwe ukungena kwiPremiership. Ithuba sisenalo. Sizozama ukuyinqoba le midlalo yethu esele,” kusho uSokhela. USikhakhane akaqali ukufaka ikilabhu kwiPremiership kwazise eminyakeni embalwa edlule ukhuphulele kulesi sigaba iChippa United emxoshise okwenja. Santos 1, Cosmos 1; Thanda 2, Stellenbosch FC 1; Eagles 0, Leopards 0; Mbombela 3, FC Cape Town 1; Magesi FC 1, Cape Town All Stars 0; Mthatha 0, Universiy of Pretoria 0; Kings 1, Spurs 1; Milano 1, AmaZulu 0.

Ithuba sisenalo...