Uvalo kothisha "abadelele" uShembe
Bathe makathathe ushoki afundise izingane ezingamaNazaretha
UKHALA ezimathonsi umndeni kaMnu Mthokozisi “Salabemkhuluma” Xulu (36), waseMbalane KwaNongoma, enyakatho yeKwaZulu-Natal, oshone ngesikhathi kusuka izidubedube kudutshulwana kwiNqokotho Maskandi Festival eCurries Fountain, eThekwini ngoMgqibelo njengoba kuvela ukuthi ubeyikho konke kuwona, kunguyena obenza kulalwe kudliwe.
Udungunyane lusuke phakathi kwabalandeli bakaKhuzani “iNdlamlenze” Mpungose nabakaMthandeni “iGcokama Elisha” Manqele nokho kwagcina kulimala nababanye abaculi njengoba uSalabemkhuluma ebeyinduna eqavile yabalandeli bakaMjikijelwa “iChalaha” Ngubane.
UMnu Mzamo Xulu, olamana noSalabemkhuluma, uthi balahlekelwe kakhulu ngoba umfowabo nguyena obondla umndeni. Uthi yena uthole ucingo ngehora lokuqala ebusuku ngeSonto luthi sekudutshulwe umfowabo eThekwini.
Utshele ILANGA ukuthi akazange akholwe ezwa lezi zindaba. Uthi umfowabo ubefike ekhaya ngoba eyobuka lo mcimbi obuseThekwini njengoba ezinze e-Eastern Cape ngokomsebenzi.
Uye kulesiya sifundazwe ezinyangeni ezintathu ezedlule njengoba ebezinze KwaMashu ngenxa yawo belu umsebenzi.
“Besiphila ngaye ekhaya njengoba kunguyena omdala futhi osebenzayo ezinganeni zakwethu eziyisi-7. Siyakhala kakhulu ngokwenzekile kodwa-ke iNkosi yiyona eyaziyo,” kusho uMnu Xulu.
Uthi kwenzeka lokhu nje, uSalabemkhuluma ubekade eyolobola ekhweni lakhe ezinyangeni ezimbili ezedlule. Uchaze umfowabo njengomuntu obenamancoko ethanda kuhlekwe ngaso sonke isikhathi.
“Siyawuthanda kakhulu umasikandi ekhaya, besilandela abaculi abahlukene futhi sichomelana ngalokho kumnandi kodwa besingazitsheli ukuthi sekungaphuma isidumbu ngalokho,” kusho uMnu Xulu.
Ingoduso kaSalabemkhuluma nguNkz Nolwazi Mandela. Le nsizwa ishiye amadodakazi ayo amathathu okunguLusanda, u-Amahle no-Akhona. UMnu Xulu uthi kuzofihlwa ngoMgqibelo kubo KwaNongoma. Igama lomunye umlandeli oshonile kalikatholakali kanti abanye abathathu abadubulekile kulesi sigemegeme basagcinwe esibhedlela, okubalwa kubona uMnu Sbongiseni Cele olandela Amageza Amahle, uMnu Xolani (esingatholakanga isibongo sakhe) weGcokama Elisha - okusalinde- leke ukuba ahlinzwe ngokusho kwenduna yabalandeli beGcokama Elisha uMnu Dlukula Ntombela - kanti omunye wabo ulandela ezeBhova naye kalitholakanga igama lakhe. Induna yaMageza, uMnu Veloh Bhengu, ithi isimo somlandeli wabo siyathembisa ngoba uhlinziwe yakhishwa inhlamvu.
Okhulumela amaphoyisa KwaZuluNatal, uColonel Thulani Zwane, uthi okwamanje kakukaboshwa muntu.
Usenxuse abanolwazi ngabantu abebedubula ukuba basize amaphoyisa. Umphathi waseCurries Fountain, uMnu Ronnie Govender, uthi okwamanje bayivalile imicimbi kamasikandi kuleya nkundla. “Abahleli bemicimbi siyabanxusa ukuba babheke ezinye izindawo abazokwenza kuzona imicimbi kusukela ezinyangeni ezine kuya phambili ngoba ibhodi lethu kusamele lihlanganise amakhanda ngale nto eyenzekile sibone nemithetho esingayisebenzisa ukugwema izimo ezifana nalezi,” kusho uMnu Govender.