ISIQALILE UKUFUNA UMQEQESHI I-CHIEFS
Isifuna owase-Europe emuva
ZIQALILE izinhlelo kubaphathi beKaizer Chiefs zokuthungatha umqeqeshi ozovala isikhundla sikaSteve “Mphathi” Komphela.
Iyaqina imibiko eqagula ukuthi uyaphela umshado phakathi kwale kilabhu nalo mqeqeshi ngenxa yokuthi uyibeke emlandweni omubi.
IChiefs iphinde edume ngakho ibambana neLamontville Golden Arrows ngo-1-1 kowe-Absa Premiership ngoMgqibelo ebusuku eFNB Stadium, eSoweto.
IChiefs yiyona ebone imbobo yepali kuqala uRyan Moon elibeka enethini kodwa uKnox Mutizwa ongumgadli we-Arrows wayiphuca iqatha emlonyeni eliqabulisa inethi sekusele amanenjana umdlalo uphele.
Ukuthola iphuzu kweChiefs kushayelele isipikili sokuthi ngeke isasinqoba isicoco seligi ebisanethemba lokuthi ingasithola.
Iphinde yazibeka emlandweni omubi njengoba sekuphele amasizini amabili ingakaze inqobe nkomishi okuyinto ebingakaze yenzeke selokhu kusungulwe iPremier Soccer League (PSL).
ILANGA lihletshelwe ngesinye isikhulu esingaphakathi kwiChiefs ukuthi uKaizer Motaung ongumnikazi wale kilabhu ukhiphe umyalelo wokuba kuqalwe kufunwe umqeqeshi omusha kwazise uKomphela imehlulile iChiefs.
Lesi sikhulu sithe: “Ngingakuqinisekisa ukuthi uyaphela umshado weChiefs noKomphela emuva kokuba uMotaung ekhiphe umyalelo wokuba kuthungathwe omunye umqeqeshi, usenele nguKomphela.
“Noma ngabe uyathanda ukumgcina ingcindezi uyithola kubaxhasi nasemagatsheni abalandeli bale kilabhu.
“Iningi labalandeli bethu linqume ukuwuduba umdlalo weArrows bangaya kuwona ngoba bezwakalisa ilaka labo lokuthi kabasamdingi uKomphela.
Bamfanisa noMengameli wezwe uJacob Zuma, kabasabuthembi ubuholi bukaKomphela bakholwa wukuthi uyishonisa phansi iChiefs, njengoba abanye abantu bakuleli bekhononda ngoMsholozi.
“Kodwa-ke okumqoka kunakho konke wukuthi umehlulile umbandela abewubekelwe obekuwukunqoba izinkomishi.
UMotaung uselahle ngisho nethemba ngabaqeqeshi bakuleli ukuthi kukhona ongahola iChiefs. Uzoqalaza e-Europe,” kusho le sikhulu esicele ukuba igama laso lingadalulwa.
Imizamo yokuthola uMotaung iphunzile njengoba ucingo lwakhe belukhala kodwa lungabanjwa.
UKomphela echaza kumabonakude ngomdlalo, ugxeke abadlali ngokungafuni ukufunda emaphutheni.
“Emdlalweni wethu odlule senze iphutha elifanayo, sadedela umdlalo sesiwunqobile. Nakulo mdlalo senze elifanayo umdlalo sesihambe nawo.
Abadlali bami kabafuni ukufunda emaphutheni yingakho siphinde iphutha elilodwa imidlalo ilandelana.
Nokho kakusasizi ukubheka emuva umonakalo sewenzekile,” kusho uKomphela.
UClinton Larsen ololonga i-Arrows, ubongele abadlali bakhe ngokubuya nephuzu.
“Benginalo ithemba lokuthi kukhona esingabuya nakho kodwa hhayi ngale ndlela. Ngiyababongela abadlali bami ngokungaliphonsi ithawula yize bekubukeka selisishonela.
Limqoka ngendlela eyisimanga leli phuzu esibuye nalo,” kusho uLarsen.