BAKHALA NGOKULOVA KUKANGQONGQOSHE
USEDUME ngokulova emihlanganweni yekomiti lasephalamende uNgqongqoshe wezokuThuthukiswa koMphakathi, uNkz Bathabile Dlamini, okuvela ukuthi lokhu kulimaza irekhodi lakhe lanyakenye njengoba ubengavamile ukuphutha.
Kubikwa ukuthi selokhu kuvulwe iphalamende ngoMasingana (January), uNkz Dlamini nesekela lakhe, uNkk Hendrietta Bogopane-Zulu, basabe yingxenye yemihlangano emithathu kuphela kweyisi-9 okufanele bayethamele ephalamende ngonyaka.
Kubikwa ukuthi ngeledlule uNkz Dlamini uphuthe emihlanganweni emibili ilandelana lapho bekudingidwa khona uhlelo lomnyango wakhe lwezezimali nebhajethi. NgoLwesibili olwedlule ikomiti elibhekene nezidingo zomphakathi - iNational Council of Provinces Oversight Committee - liqome ukuwumisa umhlangano ngoba likhala ngokungabonwa nangalukhalo kukangqongqoshe nesekela lakhe.
Kubikwa ukuthi uSihlalo weKomiti le-African National Congress (ANC), uNkk Landulile Dlamini, uthumelele ungqongqoshe umyalezo ethi ngeke baqhubeke nomhlangano kuze kuba uNkz Dlamini uba yingxenye yawo. Kufane nokuthela amanzi emhlane wedada njengoba ungqongqoshe nesekela lakhe bebengekho futhi nangakusasa.
UNkz Dlamini kuvele ukuthi ubesemhlanganweni wekhabhinethi kodwa kakukho okuvelayo ukuthi uNkk Bogopane-Zulu ubekuphi.
Ikhabhinethi likaMengameli Jacob Zuma lihlangana njalo ngoLwesithathu lwesibili enyangeni kanti ikomiti lekhabhinethi nalo lihlangana ngoLwesithathu - phakathi nomhlangano wekhabhinethi kamengameli.
“Indaba esifuna ukuyidingida mayelana nosekwenzekile ezinyangeni eziyisi-6 ezedlule, ibaluleke kabi. Ungqongqoshe nguyena ikhanda lalo mnyango kodwa akekho yena la ukuzophendula imibuzo,” kusho uLindy Wilson weDemocratic Alliance (DA).
U-Liezl van der Merwe weNkatha Freedom Party (IFP) ubeke umbono wokuthi kungakuhle leli komiti lihlangane ngezimpelasonto, uma kuwukuthi laba bantu abadingekayo bazotholakala.
Usihlalo waleli komiti, uZoleka Capa, uthe umhlangano we-oversight committe kudala waziwa ukuthi uzokuba nini, bekufanele abangeke babe yingxenye yawo basho kusenesikhathi. Uthi uNkz Dlamini ubazi kahle kamhlophe ukuthi leli komiti lizodinga umbiko ogcwele kuyena mayelana nodaba lweSouth African Social Security Agency (Sassa) olube sematheni ezinyangeni ezedlule - kuqubuka ingebhe yokuthi abantu baseNingizimu Afrika abalinganiselwa ezi-17 million kungenzeka bangayinuki imali yabo yempesheni ngenxa yenkinga yenkontikela yenkampani ezosabalalisa imali, iCash Paymaster Services (CPS).
Isizabulwembu ( website) sephalamende kubikwa ukuthi sinethuluzi elisha lokubheka izinga lokuhambela imihlangano kongqongqoshe (ephalamende).
Uhlu lwalesi sizabulwembu kuthiwa luveza ukuthi uNkz Dlamini ubebalwa nongqongqoshe abahamba phambili ekuhambeleni imihlangano ngonyaka odlule, nokho kulo nyaka uphuthe kaningana - njengoba iphalamende belingamnike thuba lifuna izimpendulo mayelana nezinkinga zezimpesheni.
USihlalo weStanding Committe on Public Account (Scopa) uMnu Themba Godi, utshele iphephandaba lesiNgisi eliphuma ngeSonto, iCity Press, ukuthi bambhalele uNkz Dlamini, bemmema neSassa nomnyango wakhe mhla zili-16 kwephezulu ukuba bayochazela leli komiti ngezinhlelo zabo ezihambisana nesinqumo senkantolo - ebimunyunga udaba lwenkontileka yeSassa neCPS.
“Banonyaka kuphela ukuba baqoke inkampani entsha ezosabalalisa izimpesheni. Sifuna ukwazi ukuthi yini asebeyenzile kuze kube manje,” kusho uMnu Godi.