Uhlanyise abazalwane uMajola ecula noKhuzani
BEKUHLANGENE zonke izinhlobo zezinkolo kubongwa abalandeli bakaMfu Andile kaMajola ngoLwesihlanu. UMajola ubenze umcimbi wokubonga abalandeli bakhe ngokumeseka nokuthenga umculo wakhe ogcine ngokudayiswa ubuthaphuthaphu.
Bekugqame imifaniswano eyahlukahlukene la bekuhleli khona abamabandla ehlukene.
U-Andile KaMajola uthe kuyinhloso yakhe vele ukuhlanganisa amabandla ahlukahlukene ngoba inhloso yabazalwane bebonke iyodwa, ukukhonza uNkulunkulu.
“Uma ungalalela i- album yami uzozwa ukuthi ngixube yonke inhlobo yomculo, kukhona izayoni, kubekhona izingoma zetende, ezendumiso nezinye.
“Lokhu ngikwenzela ukuba uma uyithenga ukwazi ukuqonda uhlobo lomculo owahlukahlukene” kuchaza uMfundisi uMajola.
Abantu bebebulala inyoka kulo mcimbi obuse Workshop, eThekwini. Itende beligcwele lichichima beze baphumela ngaphandle ingasekho nendawo yokuhlala phansi.
Lo mcimbi bekungaculi uMajola kuphela kodwa amaqembu ahlukahlukene abeshiyelana inkundla. Nabefundisi nabo bebesina bededelana ngezwi belapha abantu abebehambele lo mcimbi imiphefumulo.
UMajola uthe eseshaya ingoma yokugcina wangena nomculi kaMaskandi osematheni kulezizinsuku uKhuzani Mpungose, kwahlanya abalandeli, befuna ukuza phambili bezomthinta ngezandla.
UKhuzani uthe eqeda ukucula wathatha umbhobho wabhoboka ngesibhicongo esenzeke ngesonto eledlule lapho kushone khona ababili.
“Lokhu okusanda kwenzeka ngeke ngikhulume ngakho, ngiyazi abaningi balindele izimpendulo kumina njengoba amaphepha engibheca kodwa ngizothula uNkulunkulu wami uzongiphendu- lela. Mina inhloso yami yokucula kwakungukujabulisa abantu hhayi ukubabulala” kuchaza uKhuzani Mpungose.
Phakathi kwabebeshiyelana inkundla uJabu Dlamini, uDaluxolo Shozi, Amabandla eZayoni ahlukahlukene, iKhaya Laba-ngcwele, nabanye abaningi.
Abefundisi abebabelana ngezwi uBishop T.B Ngcobo, uB.M Buthelezi, uPastor Cwezu nabanye.
Lo mcimbi ubuwenzeka okwesibili nonyaka kanti uMajola uthembise ukuthi uzoba khona minyaka yonke. Bekungenwa mahhala.
Uma ulalela i-album yami uzozwa ukuthi ngixube yonke inhlobo yomculo...