SEKUPHELE IMINYAKA LUTHO IMALI KAYISE
USOLA umnyango wezemfundo ngokugweva nemali yelunga lawo umndeni wakwaNkosi eVryheid, enyakatho yeKwaZulu-Natal othi sekuphele iminyaka engaphezulu kwe-10 ulindele.
UNkz Zandile Nkosi (25), uthi bashonelwe nguyise zingama-29 kuMbasa (April) 2003 esebenza ngaphansi komnyango kodwa kuze kube manje lutho imali yakhe yempesheni.
Uthi uyise, uMnu Jabulani Nkosi, uqale ukusebenza eFilidi Senior Secondary School ngonyaka we-1990 wadlula emhlabeni esesebenza eMpofini High engunogada kulezi zikole.
Utshele leli phephandaba ukuthi sebekwenze konke okusemandleni abo begcwalisa amafomu emahhovisi omnyango oNdini kodwa batshelwe ukuba balinde.
Basola ukuthi kukhona okushaya amanzi ngalezi zimali.
“Ubaba ushonele khona emsebenzini futhi nawo umnyango uyakwazi lokho. Okusididayo wukuthi kungani izimali zakhe singanikezwa zona.
"Uma sifika emahhovisi sigcwalisa amafomu nsuku zonke ukuze sinikezwe izimali.
"Liphelile manje ithemba lokuthi kusazolunga. Sesicela izikhulu eziphezulu ukuba zingenelele kulolu daba ngoba sekungaphezu kwamandla ethu.
"Engizibuza khona wukuthi kanti yini lena evimbe izimali zikababa,” kusho uNkz Nkosi.
Uveze nokuthi zikhona izikhulu ngaphakathi emahhovisi omnyango oNdini ezizamile ukumsiza kodwa ziphelela endleleni.
“Ngabe kungcono ukuba siyatshelwa okumele sikulungise ukunokuba silokhu silinde into esingayazi.
"Okuwubufakazi bokuthi bekumele sizithole izimali, wukuthi uthishanhloko wakulesi sikole ubaba ashone esebenza kusona, ubesisiza kakhulu ekulandeleleni uhlelo lokuthi sithole le mpesheni nakuba naye esephonse ithawula.
"Miningi kakhulu le minyaka, siyakhala kakhulu, kudlalwa ngathi kuhulumeni,” kusho uNkz Nkosi.
Okhulumela uMnyango wezeMfundo KwaZulu-Natal, uMnu Scelo Khuzwayo, uthi lolu daba luzodluliselwa ehhovisi elibhekelele ukuqashwa kwezisebenzi emnyangweni.
Miningi kakhulu le minyaka, siyakhala kudlalwa ngathi kuhulumeni.