Yini eyenzekayo e-Antarctica?
Bayaya, akekho obuya nezimpendulo
KUSHUNQISWA sibunge sini laphaya ezinqeni zezwe e-Antarctica njengoba kulezi zinsuku izikhulu zamazwe ngamazwe ziya ziphindelela kule ndawo okwezintuthane zibona uju?
Ngabe ngobani laba asebeke baya kule ndawo ehlala yembozwe yiqhwa kungakhathalekile ukuthi yisiphi isikhathi sonyaka? Ngokwemibiko yamaphephandaba aziwayo emazweni aphesheya kwezilwandle, ayaziwa amagama njengoba egagulwa ezihlokweni zale mibiko: Obama Sends Biden on ‘Special Mission’ to Antarctica:
Huffington Post (22-01-2009);
John Kerry Visit Highlights a Continent, and Climate Policies, Under Threat: New York Times (05-11-2016);
Putin to Visit Antarctica: Moscow Times (18-01-2017);
Patriarch Kirill meets penguins at Russian base as he becomes first Orthodox leader to visit - Antarctica: The Telegraph (February 2016);
Australian Governor General’s historic visit to Antarctica (04-022013);
Buzz Aldrin is Medically Evacuated From Antarctica (0112-2016).
Uma uyibhekisisa indlela okwenzeka ngayo lokhu kuvakasha kwezikhulu nosaziwayo e-Antarctica, kuqubuka imibuzo engenazo izimpendulo.
Ake ucabange nje iPhini likaMengameli wase-United States of America (USA), uMnu Joe Biden, lithunywa kule ndawo nguMnu Barack Obama zingama-22 kuMasingana (January) wezi-2009, emuva nje kwezinsuku ezimbili efungile (uMnu Obama) ukuphatha i-USA ihlandla lokuqala.
Kakushiwo nokuthi yini inhloso yohambo, ngaphandle kokuthi nje kokuthi belukhethekile.
UMnu John Kerry, ophethe ezangaphandle khona e-USA, naye ubonakele elibhekise khona e-Antarctica sekusele izinsuku ezintathu kuvotwe okhethweni olunqotshwe nguMnu Donald Trump.
Akasalanga noMengameli Vladimir Putin waseRussia yena obevakashele khona ekusombulukeni kwawo lo nyaka mhla zili-18 kuMasingana (January), ngokusho kweMoscow Times yakhona eRussia. Kubikwa ukuthi uMnu Buzz Aldrin, ongenye yamadada amathathu abeku-Apollo 11 - owaba ngowesibili ukunyathela ebusweni benyanga, elandela uNeil Amstrong mhla zingama-21 kuNtulikazi (July) we-1969 - ubeyile kuleli lizwekazi eliyikhaya lama- penguin mhla lulunye kuZibandlela (December).
Yena-ke kuthiwa ubuye lapho etakulwa kukubi, exinwe wukugula waze wathola usizo lokwelashwa eNew Zealand. Ucashunwe ethi: “Sonke sisengozini ngenxa yobubi obusesinquthu esiseningizimu (south pole)!”
Omunye wabacwaningi abavelele ngokwenzeka kule ngxenye yomhlaba, uMnu Steve Quayle, waseUSA - obuye abe ngumbhali wezincwadi - uthi le ndawo inolwazi lwesayensi olungaphezulu kwesilwaziyo, kunjalo nje sekukudala lwaba khona.
Ngaphezu kwalokhu, uthi ngokubona kwakhe ontabakayikhonjwa abahlala lapho bayingxenye yezingelosi iBhayibheli elithi zigcinelwe ukulahlwa ngosuku olukhulu lokwahlulela (Jude 6).
Ziningi-ke izinto azishoyo uMnu Quayle, phakathi kokunye wukuthi uMnu Adolf Hitler akazibulalanga nje-ngoba umlando ofundwayo usho.
Encwadini kaMnu Clive Fletcher ongusomlando, ethi “The Fuhrer Has Gone” emakhasini okuqala angama-46, ichazwa yonke indaba ngokwenzeka mhla zingama-20 kuMbasa (April) we-1945 emcimbini omncanyana wokugubha usuku lokuzalwa kuka-Adolf Hitler.
Ivezwa kahle imininingwane ngokwenzeka lapho, nokwasekuhlangene namazwi okuvalelisa kukaHitler ezikhulwini ezazisondelene naye. Phela kwasekuyisiqalo sohlelo lokweqa kwakhe okwase kunesikhathi lulungisiwe ngokubona ukuthi lwase lugoba uphondo ohlangothini lweGermany eMpini yoMhlaba yeSibili.
U-Hitler wayephelezelwa yithimba labantu abangama-80 ababesondelene naye, phakathi kwabo okwakukhona nenqina lakhe, uNkz Eva Braun.
Ukuze lingaphunzi lelo cebo, phakathi kokunye le ntokazi eyameluleka ngakho uHitler, wukuba kuthi uma sekweqiwa, angayiphathi i- walking stick abeyiphatha njalo, eyayisifana naye.
Yameluleka futhi ukuba azigunde lezo ziphumpu zamadevu aya- ziwa ngazo. Kuthiwa ngaphansi kwawo kwakunomangqokofela wensumpa phezu kodebe olungenhla, okwakuyisona sizathu sokubeka amadevu.
Ingxenye yencwadi kaMnu Fletcher (pp.1-46) iphela uHitler esathe gozololo e-Austria, okuyizwe azalelwa kulona elingumakhelwane weGermany.
U-Quayle ukholwa wukuthi ubuholi obuphezulu bakwamanye amazwe ngaleso sikhathi bebuyazi le ndaba. U-Fletcher uyakufakazela lokhu kwiThe Fuhrer Has Gone lapho ethi uWinston Churchill - owayengundunankulu wase-England - wakhetha ngamabomu ukuba kuthiwe uHitler wazibulala noEva Braun kodwa eyithola imidati ngoHitler nokuthi wayekuphi futhi enzani.
Kuthiwa waphunyula walibhekisa khona e-Antarctica lapho khona iGermany yayingelinye lamazwe ayesenezizinda zokucwaninga. UFletcher uqhubeka athi lowo owayehola ithimba lososayensi abakha iSaturn V - okuyisiphuphutheki (rocket) - okwacitshelwa ngaso emkhathini u-Apollo 11 ohambeni lwawo oluya enyangeni ngowe-1969 - u-Wernher von Braun, wake wathi akusilona iqiniso ukuthi ososayensi baseGermany bayabedlula abakwezinye izindawo ngokuhlakanipha kepha yingoba bethola usizo “lwangaphandle”.
Encwadini uQuayle asanda kuyikhipha, ethi “EMPIRE Beneath the Ice - How the Nazis Won World War II” ukholwa wukuthi kunombuso othile wabantumbi ( aliens) e-Antarctica.
Uthi ngowe-1947 i-USA ithumele ujenga lwemikhumbi eli-13 yombutho wezempi, eyayiholwa nguAdmiral Richard Byrd, emkhankasweni owawubizwa nge-Operation High Jump. Inhloso yalo mkhankaso kayicaci ngoba inezinhlangothi ezimbili. Okokuqala, kuthiwa kwabe kuwukuyoqotha imbokodo nesisekelo ezizindeni zempi zeGermany. Okwesibili, kuhlawumbiselwa ekutheni kwakuhloswe ukuba i-USA iyonyonkela kumbe iyohlenga lolo lwazi lobuchwepheshe okuthiwa luseAntarctica. Kuthiwa imikhumbi yabe inamatilosi ayizi-4 700 nezikhali eziphambili zangaleso sikhathi. Empeleni impi ka-Admiral Byrd yehluleka yancama kulowo mkhankaso ngenxa yokuba phezulu kwezinga lobuchwepheshe ababufica kuleliya lizwekazi.
Uma sekubuyiwe, esinye sezikhulu sabikela uhulumeni waseUSA ukuthi ngesikhathi bekwiOperation High Jump, izinhloli zaseRussia zazibaqopha ngomshini othwebulayo, okulapho kwavela ukuthi impi leyo yavinjwa yimishini endizayo efana nesoso lenkomishi yetiye (Unidentified Flying Objects - UFO).
Okumangalisayo ngalolu lwazi, wukuthi bese luyinto okwakuxoxwa ngayo kudala ngezikhathi kusaphila usosayensi wase-England, uSir Francis Bacon, ngowe1627 okuwunyaka aloba ngawo incwadi ethi, “New Atlantis” nokho angaqedanga ukuyibhala.
Kule ncwadi uBacon ukhuluma ngezinga lobuchwepheshe eliphakeme elase likhona ngaleyo minyaka. Phakathi kokunye kwalobo buchwepheshe, kubalwa i- genetic engineering, i- laser weapon nezakhiwo eziyizitezi ezifika kwelenyoni. U-Quayle uthi ukuphakama kwezinga lobuchwepheshe obulaphaya, kungaphezulu ngeminyaka eminingi kakhulu kolwazi esinalo njengamanje.
Uthi kunenkolelo yokuthi imboni yezamafilimu yase-USA, iHollywood, inokuxhumana okuthile nabantumbi abayichathazela ulwazi bese iluveza emphakathini ngamancozuncozu ngokwenza amafilimu angama- science fiction.
Ukholwa wukuthi lonke ulwazi obelufihlakele, kwahlelwa ngabantumbi ukuthi luyoputshukiswa nini futhi kanjani, njengohlelo lokusebenza imiqondo yoquqaba ukuyilungisela ukufika kwabo phakathi kwethu esikhathini esizayo. Wengeza ngokuthi kuyamangalisa ukuthi yonke le nto isibe yimfihlo isikhathi esingaka uquqaba lungayazi, okuwukuthi sekuya ngamagama ashiwo yiNkosi uJesu lapho ithi akukho olufihliwe olungeyukwambulwa esikhathini esizayo.
Phela uQuayle ungumKristu ozinike isikhathi sokwenza ucwaningo ngalezi zinto akhuluma futhi alobe izincwadi ngazo.
Ngaphandle kwalokho, uthi baningi abantu abasuke bezibonele ngo"si” lezi zinto abamfakazelayo kwakushoyo futhi abaye bamcobelele olunye ulwazi.
Laba ngabantu abanezikhundla emibuthweni yezempi futhi abazi izimfihlo ezinkulu zohulumeni.
Njengoba kwaziwa ukuthi kuthe uma umbutho waseGermany wehlulwa eMpini yoMhlaba yeSibili, amazwe aphuthuma ukuyozitapela ososayensi babe yiziboshwa zempi ezizothuthukisa ngolwazi lawo mazwe azithumbile.
Kuyaziwa futhi ukuthi amazwe abehamba phambili kulokhu yiUSA neRussia njengoba womabili ayeholwa ngososayensi baseGermany ebuchwephesheni beziphuphutheki ezazithumela abantu enyangeni.
NeGermany ngokwayo yathumba izazi zesayensi okwabe kukhona kuzona amaJuda namaKhrestu, yaziyisa khona e-Antarctica ukuyosiza emshikashikeni wokusungulwa kwedolobha elibizwa ngeNew Berlin.
Kuthiwa e-Antarctica kunesango elikuholela endaweni yombuso engaphansi kogqinsi lweqhwa.
Ekungeneni uthola incazelo ngokuthi uthubeleza kanjani emhhumeni ozokukhiphela kulelo lizwe, okuwukuthi uma ungayilandeli ungavelelwa yingozi.