KUGQAME INJEJANE KUNQOBA I-SHARKS
KUGQAME injejane iCell C Sharks ibukisa ngeWestern Force yase-Australia, iyibhudluza ngo-37-12 koweVodacom Super Rugby ngoMgqibelo eGrowthpoint Stadium, eThekwini. UJeremy Ward (21) - obedlala i-inside centre kulo mdlalo ngenxa yokuthi u-Andre Esterhuizen udonsa isigwebo sekhadi elibomvu - uSbusiso Nkosi (21) oyi-winger, uCurwin Bosch (19) oyi-flyhalf, ubungafunga ukuthi bathelwe ngezibonkolo ngendlela abebevutha bengabaselwe ngayo.
UNkosi obegijima umdlalo wakhe wokuqala weSuper Rugby, uphoxekile njengoba bekufanele kube nguyena ovula umgodla weSharks wama-try kodwa eyakhe yaphikwa ngunompempe, uRasta Rasivhenge ophoqeleke ukuba axhumane nonompempe kamabonakude, uShaun Veldsman, ukuze athathe isinqumo.
UNkosi, obesika izitobha kuhle kommese oshisayo ebhoteleni, elekelela kuwona wonke amakhona enkundla, ushaye enhle i-try ngomzuzu wama-24 emuva kokusika izitobha zeForce kodwa yangabalwa ngenxa yokuthi uBosch uliphuthazile ibhola ngaphambi kokulidlulisela kuyena - okungavumelekile embhoxweni.
Ngalesi sikhathi oShaka bebehamba phambili ngo-6-0 wamaphenathi amabili aqotshelwe phakathi nguBosch. Lo mdlali waseVeru- lam (Nkosi) uphunyukwe yileli thuba lokuzakhela umlando nje - wokushaya i-try yakhe yokuqala emdlalweni wakhe wokuqala walo mqhudelwano - ubesephuma ngaphandle njengoba eke walimala kabuhlungwana.
I-Sharks izoke idlale ngaphandle kukaBosch njengoba elibangise eGeorgia neqembu lesizwe labaneminyaka engaphansi kwengama-20 ubudala emidlalweni yeNdebe yoMhlaba. Kulo mdlalo kubonakale uPatrick Lambie obese kunesikhathi engadlali ngenxa yokulimala.
Isiyonke imiphumela yemidlalo yeSuper Rugby ebingempelasonto imi kanje:- Jaguares 46, Sunwolves 39; Bulls 24, Crusaders 62; Sharks 37, Force 12; Waratahs 33, Blues 40; Chiefs 46, Reds 17; Rebels 10, Lions 47; Cheetahs 41, Highlanders 45; Hurricanes 41, Stormers 22.