UBAXTER USANEZINHLELO EZINQALA NGE-SUPERSPORT
KUSONGELANA abaqeqeshi bamakilabhu agijima kwi-Absa Premiership ngaphambi komdlalo ongase ucacise ngekusasa lawo ngesicoco seligi.
ISuperSport United izodudulana neCape Town City koweligi kusasa ngoLwesibili ngo-19h30 eLucas Moripe Stadium, e-Atteridgeville. ISuperSport iya kulo mdlalo nje, ngoMgqibelo ebusuku iqumbe phansi iPolokwane City ngo-32 koweligi ePeter Mokaba Stadium, ePolokwane.
Umdlalo weSuperSport neCape Town City ufaniswa nowamanqamu kula makilabhu njengoba ungase ucacise ngekusasa lawo ngesicoco seligi.
ICity yiyona ebukeka isenethuba elingcono uma iqhathaniswa neSuperSport. U-Erick Tinkler ocija iCity, uthi bazoyenza isilo sengubo iSuperSport.
“Lo mdlalo uzokuba nzima kodwa noma kanjani sizobashaya. Ngibabonile bedlala nePolokwane, bayavuza emuva. Uma ubheka indlela esishesha ngayo phambili kangiboni bezosimela.
“Lo mdlalo ufana nowamanqamu kithina ngoba sinethuba elingcono kunabo lokunqoba iligi. Sizokwenza konke okusemandleni ukuwunqoba lo mdlalo,” kusho uTinkler.
UStuart Baxter ololonga iSuperSport, uthi bazimisele ngokuwaqeda amathemba eCity ngeligi.
“ICity inethuba elingcono kunathi kodwa sifuna ukukuqeda konke lokho. Ngifuna ukushiya iSuperSport isemidlalweni yase-Afrika. Ithuba sinalo, into emqoka nje wukuthi sigudluze iCity.
Kodwa kunezinto okufanele sizilungise ngoba emuva sibuye sihuqe ubuthongo sigcine siphisana ngamagoli alula,” kusho uBaxter. Isiyonke imidlalo ye-Absa Premiership ezogijinywa phakathi nesonto imi kanjena:KUSASA NGOLWESIBILI ELucas Moripe: SuperSport United vs Cape Town City 19h30 (SS4).
NGOLWESITHATHU ELucas Moripe: Mamelodi Sundowns vs Baroka FC 19h30 (SS4).
EGoble Park: Free State Stars vs Bidvest Wits 19h30 (SS9). EDr. Molemela: Bloem Celtic vs Orlando Pirates 19h30 (Select). EHarry Gwala: Maritzburg Utd vs Platinum Stars 19h30. senzos@ilanganews.co.za