LIGAYA NGOMUNYE UMHLATHI KWI-SPAR
BAYIQALE kahle imidlalo yokuzilungiselela i-International Association of Athletics Federation (IAAF) World Championships ezokuba ngoNcwaba (August) eLondon abasubathi baseNingizimu Afrika bedla ubhedu kwi-IAAF Diamond League eDoha, eQatar.
UCaster Semenya no-Akani Simbine banqobe kwi-800m nakwi-100m ngokwahlukana emlenzeni wokuqala obungoLwesihlanu ebusuku. UCaster uqophe isikhathi esingu-1:56:61 ebekwe ezithendeni nguMargaret Wambui waseKenya ngo1:57:03.
USimbine ufike entanjeni ngesikhathi esingu9.99 eshiya u-Asafa Powell waseJamaica oke waphatha irekhodi lomhlaba noJustin Gatlin waseUnited States of America (USA) obebhekwe ngabomvu ukwenza kahle. Bobabili uPowell noGatlin bahluleke bancama ukungena nabokuqala abathathu. U-LJ van Zyl ungene isithathu kwi400m Hurdles ngo-49:49.
Umlenze wesibili kweli-14 yeDiamond League uzokuba ngoMgqibelo eChina.
UMengameli we-Athletics South Africa (ASA), u-Aleck Skhosana, uthe ukwenza kahle kwabasubathi bakuleli eQatar kumnika ithemba lokuthi bazogila izimanga eLondon.
* Ziqale ngegiya eliphansi izimfivilithi kwiSpar Women 10km Challenge yanonyaka. Emlenzeni wokuqala obungenyanga edlule eCape Town kunqobe uLouisa Leballo engabhekwe muntu, kanti ngoMgqibelo kwenzeke okufanayo intambo ishaywa nguKesa Molotsane.
UKesa uzakhele igama kwiCross Country kuleli kanti ushaye intambo ngesikhathi esingu-33:13 kulo mjaho obuseBhayi. Ubemiswe kabi nguIrvette van Zyl oyingqwele yeWomen Grand Prix kwathi uMapaseka Makhanya wangena isithathu. ULouisa ungene unombolo 9.
Umlenze wesithathu kweyisi-6 yeSpar Grand Prix uzokuba mhla zili-11 kwezokwethwasa eThekwini.
* Isiyonke imiphumela yeSpar ihambe kanje: 1.Kesa Molotsane 33:13, 2.Irvette van Zyl 33:21, 3.Mapaseka Makhanya 33:40, 4. Nolene Conrad 33:46, 5.Lebogang Phalula 33:59, 6.Elisabet Arsedo 34:04, 7.Cornelia Joubert 34:10, 8.Glenrose Xaba 34:13, 9.Louisa Leballo 34:35, 10.Zintle Xiniwe 35:07.
* Eye-5km: 1.Megan Dempster 18:58, 2.Siphokazi Nojoko 19:31, 3.Lara de Bloe 19:54, 4.Lizandre Muler 20:11, 5.Thozama Bokile 20:27, 6.Sibongile Xuba 22:08, 7.Rutendo Gallant 22:31, 8.Wilmien van Biljon 23:16, 9.Fazlin Settler 23:23, 10.Shene Delport 23:42.