Ukhahlelwe waphuka ikhala owoSuthu
Lsalokoza inhlansi yethemba ngemidlalo yokuhlunga
AMAZULU FC abuyise ithemba lokungena kweyokuhlungela ukunyukela kwi-Absa Premiership eguqisa iSantos ngo-3-0 koweNational First Division (NFD) izolo ngeSonto ntambama ePrincess Magogo Stadium, KwaMashu.
Amagoli oSuthu abhajiswe enethini nguSiyabonga Nomvethe kuyiphenathi ngomzuzu wama-29, u-Ovidy Karuru ngowama-37 noTapelo Nyongo ngowama-68. ISantos iqede lo mdlalo ingasaphelele kukhishwa ngekhadi elibomvu uJustin Dowood ngomzuzu wama-45. Uphule ikhala ngesicathulo uKaruru, unondweba wangananaza ukumnika ikhadi elibomvu. Indawo kaKaruru ithathwe nguLungelo Dlamini.
Lo mphumela ubuyise ithemba oSuthwini kwazise kalikaliphonsi ithawula ngokuya kweyokuhlunga yize sekulele emseni wamanye amakilabhu. Lunqoba lo mdlalo nje, bese lugijime emibili imiphumela iphika, okuyiyona edale umonakalo.
UJoey Antipas ocija uSuthu, uthi nakuba umjabulisa lo mphumela kodwa bekufanele bahlohle inqwaba yamagoli.
“Ukuya kweyokuhlunga akusekho ezandleni zethu kodwa ithemba lisekhona ngoba izibalo zisasivuma.
“Ngijabule ngomphumela kodwa ngikholwa wukuthi bekufanele sihlohle inqwaba yamagoli kunalawa esiwatholile kodwa sawayeka. Amagoli abalulekile uma kunjena, yingakho uma livuma ithuba kufanele ungabi nazwelo,” kusho u-Antipas.
AmaZulu kuzokuthi ngoLwesithathu ngo-15h00 abhekane neJomo Cosmos koweligi eKing Zwelithini Stadium, eMlazi.
U-Antipas ephawula ngalo mdlalo, uthe: “Isikhathi sokulahla amaphuzu kasisekho, manje kufanele siyinqobe yonke imidlalo. Umdlalo weCosmos umqoka kufanele siwunqobe. Yiwona ozocacisa ngekusasa lethu.
UTony de Nobrega ocija iSantos, uthi ukuphuma ngekhadi elibomvu komdlali wabo kubabulele.
“Besize ngenhloso yokuzoxova uSuthu kodwa izinto zangahamba ngokohlelo. Umdlalo siwuqale kahle sibulawe yikhadi elibomvu esilitholile.
“Lisikhiphile emdlalweni kanti vele nemimoya ibiphansi njengoba selisigencile izembe,” kusho uDe Nobrega othi akakazi noma uzokwehla nayo yini le kilabhu ukuya kwi-ABC Motsepe League.