IWits iqede ngamathuba eChiefs
ISundowns isamincile nakuba ibhubhise iBucs
USEQALA ukuphelelwa yithemba ngesicoco seAbsa Premiership uPitso “Jingles” Mosimane ongumqeqeshi weMamelodi Sundowns ebhambabule i-Orlando Pirates ngo-2-0 koweligi izolo ngeSonto ntambama e-Orlando Stadium, eSoweto.
Amagoli okunqobe ngawo iDowns avalelwe enethini nguKhama Billiat ngomzuzu wama-25 noYannick Zakri ngowama-49. Yize iDowns ikwazile ukubuya namaphuzu amathathu amqoka kulo mdlalo, ukunqoba kweBidvest Wits iMaritzburg United ngo-1-0 wegoli likaPhumlani Ntshangase elingene ngomzuzu wa-56 kumkhathaze kakhulu uMosimane.
Ukunqoba kweDowns neWits kuwaqede nya amathuba eKaizer Chiefs okunqoba le nkomishi njengoba isiphumile embangweni. IziMpofana zinamaphuzu anga- ma-47. Ngisho zingayinqoba yonke imidlalo esele zizokuba namaphuzu angama-56 ekubeni iWits kumanje inangama-57.
Inkulumo kaMosimane yangemuva komdlalo ikhombise ukuthi useqala ukulahlekelwa yithemba ngalesi sicoco.
“IWits uma kudaliwe ukuthi izonqoba iligi, makube njalo. Kuyifanele ukunqoba ngoba ilwe kanzima isizini yonke. Thina okwethu wukunqoba imidlalo emithathu esele bese sibona ukuthi kwenzeka njani ekugcineni. Sikuqonda kahle ukuthi ngeke sinqobe yonke into. Sisanda kunqoba iCaf Champions League neSuper Cup,” kusho uMosimane.
IDowns ebidlala ingcwenga yebhola izolo, imincele ukuthi kube khona umdlalo iWits ezoqhuzuka kuwona bese yona iyinqoba yonke eyayo ukuze balingane ngamaphuzu.
UKjell Jonevret ongumlolongi weBucs, uyivumile induku. Uthi bekuzokuba nzima ukubhodloza udonga lweDowns obelufana nokhonkolo.
Uthi usebheke ukulungisa amaphutha emdlalweni olandelayo weBloemfontein Celtic bese elungiselela owe-Ajax Cape Town nowo- kugcina weLamontville Golden Arrows. Ukuhlulwa kweBucs, kuyiqhelise kakhudlwana kwitop 8 okuyinto esiyidlalela kwiligi kule sizini. Ibihlulwa okwesibili kulandelana njengoba ihlulwe yiWits ngo-1-0 phakathi nesonto.
IPlatinum Stars yandise usizi lweHighlands Park iyihlula ngo-1-0 izolo eRoyal Bafokeng Stadium, eNorth West.
I-Ajax ihlule iChippa United ngo-1-0 ngoMgqibelo ntambama kwathi i-Arrows yabambana neChiefs kuba ngu-1-1 ngoMgqibelo ebusuku. I-Ajax neArrows yibona abasembangweni neBucs wokungena kwi-top 8 eyithikithi lokudlala kwi-MTN8 okuwumqhudelwano onemali eningi ukuyedlula yonke edlalelwa kwiPremier Soccer League (PSL).
IDowns izodudulana neBaroka ngoLwesithathu ngo-19h30 eLucas Moripe Stadium, eTshwane. IWits yona izokube ilwela amaphuzu amathathu ibhekene neFree State Stars ngesikhathi esifanayo eGoble Park, eFree State.
Ngemuva kwalokhu iDowns izovakashelwa yiMaritzburg United bese isonga isizini ngokududulana neHighlands Park eMakhulong Stadium, eTembisa. IWits izongqubuzana nePolokwane City bese isonga isizini ngokudlala neChiefs eFNB Stadium.
Pirates 0, Sundowns 2; Platinum 1, Highlands 0; Wits 1, Maritzburg Utd 0; Chiefs 1, Arrows 1; Polokwane 2, SuperSport 3; Chippa 0, Ajax 1; Cape Town City 1, Free State Stars 0.