Selukubameli olweGcokama
Lihlasele intatheli yeLANGA
SELUSEZITHEBENI zabameli bephaphandaba ILANGA udaba lomculi kamasikandi odlubulundele emngcwabeni washaya intatheli yeLANGA isemsebenzini KwaNongoma, enyakatho yeKwaZulu-Natal.
UMthandeni “iGcokama Elisha” Manqele, uzifake emanzini abilayo ngesikhathi ejaha intatheli ye
LANGA, uMthobisi Sithole, eyishaya phambi kwabantu ngesikhathi kuqhubeka umngcwabo womlandeli kamasikandi, uMthokozisi “Salabemkhuluma” Xulu obefihlwa ngoMgqibelo.
Kubikwa ukuthi leli ciko lidlubulundele ngisho uzakwabo osemnkantshubomvu kumaskandi, u-Ali Mgube, ezama ukulivimba. UMnu Xulu obengumlandeli womculi kamaskandi, uMjikijelwa “iChalaha likaShafuza” Ngubane, udutshulwe eCurries Fountain, eThekwini ngesikhathi kusuka udungunyane phakathi kwabalandeli bakaKhuzani “iNdlamlenze” Mpungose nabeGcokama kwiNqokotho Maskandi Festival ebihlelwe nguMnu Charles Dlamini emasontweni amabili edlule.
Ngokwemibiko iGcokama lithe lisazoshaya nezinye izintatheli. Ngokusho koMhleli Omkhulu we
LANGA, uNkz Thobile Nxumalo, abameli baleli phendandaba basacubungula amaphepha ngaphambi kokuba bathathe izinyathelo ezifanele.
“Siphoxekile ngesenzo saleli ciko. Sicela wonke amaciko aziphathe ngendlela eyamukelekile emphakathini ukuze kusebenzeke kahle nawo,” kusho uNkz Nxumalo.
UMhleli weSolezwe okungelinye lamaphephandaba esiZulu, uNkkSlindile Khanyile, uthe bayasigxeka isenzo sokuhlaselwa kwezintatheli. “Sicela kube nokubekezelelana ngoba sonke siyadingana. Abafundi bethu esibabhalelayo okungabalandeli babo, bayadinga ukwazi ukuthi kwenzekani, ngakho kumele kusetshenziswane. Ngeke sikuvumele ukuphazanyiswa kokusebenza kwezintatheli noma yingayiphi indlela noma kwenziwa ngubani,” kusho uNkk Khanyile.
ISekela-sihlalo leSouth African National Editors Forum (Sanef), uNkz Katy Katopodis, lithe basigxeka ngamagama wonke isenzo sokuhlaselwa kwezintatheli zisemsebenzini. Uthi uma umuntu engahambisa-ni nokubhalwe yintatheli, kasikho nesincane isidingo sokuyishaya.
“Uma ungeneme ngokubhalwe yintatheli xhumana nomhleli. Uma umhleli ehluleka wukukusiza ungadlulela phambili kwiPress Ombudsman. Kuyicala elibomvu ukushaya intatheli futhi kukhinyabeza nelu-ngelo layo elishicilelwe ku-mthethosisekelo wezwe lokubika ngoku-khululeka,” kusho uNkz Katopodis.